ମହାମାରୀ କରୋନା ସହ ମୁକାବିଲା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ମଧ୍ୟରାତ୍ର ଠାରୁ ଆସନ୍ତା ଏପ୍ରିଲ ୧୪ ତାରିଖ ପର୍ଯ୍ୟନ୍ତ ଦେଶରେ ସମ୍ପୂର୍ଣ୍ଣ ‘ଲକ ଡାଉନ’ ଘୋଷଣା କରିଛନ୍ତି । ‘ଲକ ଡାଉନ’ ସମେତ ପିଏମ ମୋଦି ସାମାଜିକ ଦୂରତା ଉପରେ ମଧ୍ୟ ଖୁବ ଗୁରୁତ୍ୱ ଦେଉଛନ୍ତି । ଯେତେ ସମ୍ଭବ ସେତେ ଦୂରତା ରକ୍ଷା କରିବାକୁ ଦେଶବାସୀଙ୍କ ନିକଟରେ ଅପିଲ କରୁଛନ୍ତି । କାରଣ କରୋନା ମୁକାବିଲା ପାଇଁ ଏହା ହେଉଛି ଏକ ମାତ୍ର ବିକଳ୍ପ । ନଚେତ ଆଗକୁ ପରିସ୍ଥିତି ଖୁବ ଜଟିଳ ହୋଇପାରେ ବୋଲି ପ୍ରଧାନ ମନ୍ତ୍ରୀ ମୋଦି ଦେଶବାସୀଙ୍କ ଉଦ୍ଦେଶ୍ୟରେ ଦେଇଥିବା ଦ୍ଵିତୀୟ ଅଭିଭାଷଣରେ ବୟାନ କରିଛନ୍ତି ।
Union Cabinet meeting chaired by Prime Minister Narendra Modi underway at 7 Lok Kalyan Marg, social distancing seen. #COVID19 pic.twitter.com/un3aXd8I8O
— ANI (@ANI) March 25, 2020
କିନ୍ତୁ ପିଏମ ମୋଦିଙ୍କ ଏହି ଭାଷଣ କେବଳ ଭାଷଣରେ ସୀମିତ ନାହିଁ । ସେ ନିଜେ ଏହି ନିୟମ ମାନ ପାଳିବା ସହ ଖୋଦ ପିଏମଙ୍କ କ୍ୟାବିନେଟ ମଧ୍ୟ ନିଷ୍ଠାର ସହ ଏହି ନିୟମ ମାନୁଛନ୍ତି । ସେମାନେ ବି ନିଜ ନିଜ ଭିତରେ ସାମାଜିକ ଦୂରତା ରକ୍ଷା କରୁଛନ୍ତି । କ୍ୟାବିନେଟ ବୈଠକର ଏକ ଫଟୋ ଦେଖି ହିଁ ଏହା ଆପଣ ଭଲ ଭାବେ ବୁଝିପାରିବେ । ବୈଠକ ସମୟରେ ସମସ୍ତ ମନ୍ତ୍ରୀଗଣ ପରସ୍ପର ଠାରୁ ଯଥେଷ୍ଟ ଦୂରତା ରକ୍ଷା କରି ବସିଛନ୍ତି । ନିଜେ ପାଳିବା ସହ ଦେଶକୁ ମଧ୍ୟ ସମାନ ବାର୍ତ୍ତା ଦେଉଛନ୍ତି ।
ଖବର ଅନୁଯାୟୀ ଭାରତରେ କରୋନାରେ ପାଖାପାଖି ୫୬୨ ଜଣ ଆକ୍ରାନ୍ତ ହୋଇଥିବା ରିପୋର୍ଟ ଆସିଥିବା ବେଳେ ସେମାନଙ୍କ ମଧ୍ୟରୁ ୫୧୨ ଜଣଙ୍କର ଚିକିତ୍ସା ଚାଲିଛି । ଏହି ଭୟଙ୍କର ମହାମାରୀରେ ଏଯାବତ ୧୧ ଜଣଙ୍କର ମୃତ୍ୟୁ ବି ହୋଇସାରିଲାଣି । କାଲି ସୁଦ୍ଧା ବିହାରରେ ଜଣେ, ମଧ୍ୟପ୍ରଦେଶରେ ୫ ଜଣ, ତେଲେଙ୍ଗାନାରେ ତିନି ଜଣ, ଗୁଜୁରାଟରେ ତିନି ଜଣ, ମହାରାଷ୍ଟ୍ରରେ ୫ ଜଣ କରୋନା ସଂକ୍ରମିତ ବୋଲି ଜଣା ପଡିଛି ।