କୋଭିଡ ମୁକାବିଲା ପାଇଁ ଭାରତକୁ ସହାୟତାର ହାତ ବଢ଼ାଇଲା ଆମେରିକା, ଭ୍ୟାକ୍ସିନ ଉତ୍ପାଦନ ପାଇଁ ପଠାଇବ କଞ୍ଚାମାଲ
କୋଭିଡ ମୁକାବିଲା ପାଇଁ ଭାରତକୁ ସହାୟତାର ହାତ ବଢ଼ାଇଛି ଆମେରିକା। କୋଭିଡ ଭ୍ୟାକ୍ସିନ ଉତ୍ପାଦନ ପାଇଁ କଞ୍ଚାମାଲ, ଅକ୍ସିଜେନ ଓ ଷ୍ଟ୍ରାଇକ ଟିମ ପଠାଇବ ଆମେରିକା। ସେରମ ଇନ୍ଷ୍ଟିଚ୍ୟୁଟରେ କୋଭିସିଲଡ ଟିକା ଉତ୍ପାଦନ ପାଇଁ ଆମେରିକା କଞ୍ଚାମାଲ ଯୋଗାଇବ। ଏଥିପାଇଁ ଯୋଗାଣ ନେଇ ନିଜର ଅର୍ଡରକୁ ଭାରତକୁ ଡାଇଭର୍ଟ କରାଯିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଆମେରିକା ରାଷ୍ଟ୍ରପତି ଜୋ ବାଇଡେନ ଟେଲିଫୋନରେ କଥା ହେବା ପରେ ଆମେରିକାର ପ୍ରଶାସନର ବରିଷ୍ଠ ଅଧିକାରୀ ଏହିଁ ସୂଚନା ଦେଇଛନ୍ତି।
କୋଭିଡ ମୁକାବିଲା ପାଇଁ ଭାରତକୁ ସହାୟତା କରିବା ପାଇଁ ଆମେରିକା ପ୍ରସ୍ତୁତ। ଏଥିପାଇଁ ସିଡିସି ଏପିଡେମିକ ଇଣ୍ଟେଲିଜେନ୍ସ ସର୍ଭିସ ଅଫିସର ଓ ଜନସ୍ୱାସ୍ଥ୍ୟ ବିଶେଷଜ୍ଞଙ୍କୁ ନେଇ ଗଠିତ ଷ୍ଟ୍ରାଇକ ଟିମ୍ ଆମେରିକା ପଠାଇବ । ଏହି ଟିମ ସର୍ଭିଲେନ୍ସ, ଲାବୋରେଟୋରୀ ସେବା ସଂକ୍ରମଣ ରୋକିବା ଦିଗରେ ଭାରତୀୟ ବିଶେଷଜ୍ଞଙ୍କ ସହ ମିଶି କାମ କରିବ। ସେହିପରି ୟୁରୋପୀୟ ସଂଘ ପକ୍ଷରୁ ଖୁବଶୀଘ୍ର ମେଡିକାଲ ଅକ୍ସିଜେନ ଓ ରେମଡେସିଭିର ଆସି ପହଞ୍ଚିବାର ଆଶା ରହିଛି । ଏଥିପାଇଁ ଭାରତ ପକ୍ଷରୁ ୟୁରୋପୀୟ ସଂଘକୁ ଅନୁରୋଧ କରାଯାଇଥିଲା।