କାହିଁକି ଦେଶ ଛାଡି ୟୁକ୍ରେନ ମୁହାଁ ହେଉଛନ୍ତି ଭାରତୀୟ ଛାତ୍ରଛାତ୍ରୀ, ଜାଣନ୍ତୁ କଣ ରହିଛି କାରଣ
ୟୁକ୍ରେନ ଉପରେ ରୁଷ ତରଫରୁ ଆକ୍ରମଣ କରାଯିବା ପରେ ହଜାର ହଜାର ସଂଖ୍ୟକ ଲୋକ ଦେଶ ଛାଡି ପଳାୟନ କରୁଛନ୍ତି । ୟୁକ୍ରେନ ନାଗରିକ ତ ଦେଶ ଛାଡ଼ୁଛନ୍ତି ଆଉ ଯେଉଁମାନେ ଅନ୍ୟ ଦେଶରୁ ଆସି ୟୁକ୍ରେନରେ ଫସି ରହିଛନ୍ତି ସେମାନେ ବି ତୁରନ୍ତ ଯୁଦ୍ଧଗ୍ରସ୍ତ ଦେଶ ଛାଡି ଯିବାକୁ ଚେଷ୍ଟା ଚଳାଇଛନ୍ତି । ଅନେକ ସଂଖ୍ୟକ ଭାରତୀୟ ବି ୟୁକ୍ରେନରେ ଫସି ରହିଥିବା ନେଇ ବାରମ୍ବାର ଖବର ମିଳୁଛି । ସୂଚନାରୁ ଜଣାଯାଇଛିକି ପ୍ରାୟ ୨୦ ହଜାର ସଂଖ୍ୟକ ଭାରତୀୟ ଛାତ୍ର ୟୁକ୍ରେନରେ ରହି ପଢାପଢି କରୁଛନ୍ତି । ସେମାନଙ୍କୁ ଏବେ କେମିତି ସୁରକ୍ଷିତ ଭାବରେ ବାହାରକୁ ବାହାର କରାଯିବ ତାହା ଏବେ ସମସ୍ତଙ୍କ ପାଇଁ ଯେମିତି ମୁଣ୍ଡବିନ୍ଧାର କାରଣ ପାଲଟିଛି । ୟୁକ୍ରେନରୁ ୟୁରୋପ ସୀମା ମଧ୍ୟକୁ ପ୍ରବେଶ କରୁଥିବା ଭାରତୀୟ ମାନଙ୍କୁ “ଅପରେସନ ଗଙ୍ଗା” ସାହାଯ୍ୟରେ ସ୍ବଦେଶକୁ ଫେରାଇ ଅଣାଯାଉଛି ।
ଭାରତୀୟ ଛାତ୍ର ୟୁକ୍ରେନର ଭିନ୍ନ ଭିନ୍ନ ପ୍ରାନ୍ତରେ ମେଡିକାଲ ପଢିବା ପାଇଁ ଯାଇଥିଲେ । ଏବେ ସମସ୍ତଙ୍କ ମନରେ ପ୍ରଶ୍ନ ଉଠୁଥିବ କାହିଁକି ଏତେ ସଂଖ୍ୟକ ଭାରତୀୟ ଛାତ୍ର ମେଡିକାଲ ପଢିବା ପାଇଁ ୟୁକ୍ରେନ ପରି ଦେଶକୁ ହିଁ ବାଛୁଛନ୍ତି ? ପଚରା ଉଚୁରା କରାଯିବା ପରେ ଜଣାପଡିଥିଲାକି ଅଧିକାଂଶ ଛାତ୍ର ଭାରତର ପ୍ରାଇଭେଟ ମେଡିକାଲ କଲେଜରୁ ଡିଗ୍ରୀ ହାସଲ କରିବାରେ ବର୍ଷକୁ ପ୍ରାୟ ୧୫ ରୁ ୨୦ ଲକ୍ଷ ଟଙ୍କା ଖର୍ଚ୍ଚ କରୁଛନ୍ତି । ଯେବେକି ୟୁକ୍ରେନରେ ଏହି ଫିସ ଖୁବ କମ ପଡିଥାଏ । ସେନେଇ କିଛି ଜଣଙ୍କ ମତାମତ ବି ନିଆଯାଇଥିଲା । ଗୁଜୁରାଟ ସୁରଟ ସହରର ନିବାସୀ ମହସୁର ୟୁକ୍ରେନର Vinnytsiaର VNMU ବିଶ୍ୱବିଦ୍ୟାଳୟରେ ଏମ୍ବିବିଏସର ଦ୍ଵିତୀୟ ବର୍ଷର ଛାତ୍ର ଅଟନ୍ତି । ଦୁଇ ବର୍ଷ ପୂର୍ବେ ସେ ପଢିବା ପାଇଁ ସେ ୟୁକ୍ରେନ ଯାଇଥିଲେ । ମହନୁରଙ୍କ କହିବା ଅନୁଯାୟୀ ୟୁକ୍ରେନରେ ପଢିବା ପାଇଁ ବର୍ଷକୁ ପାଖାପାଖି ୬୦୦୦ ରୁ ୭୦୦୦ ଡ଼ଲାର ଖର୍ଚ୍ଚ ହୋଇଥାଏ । ଯାହା ମଧ୍ୟରୁ ଟ୍ୟୁସନ ଫି ପ୍ରାୟ ୫୦୦୦ ଡ଼ଲାର ହେବ । ଏହା ବ୍ୟତୀତ ହଷ୍ଟେଲ ଖର୍ଚ୍ଚ ଏକ ହଜାର ଡ଼ଲାର ପାଖାପାଖି ଆସିଥାଏ ।
ଏମିତି ଦେଖିଲେ ୟୁକ୍ରେନରେ ପାଞ୍ଚ ବର୍ଷର ଏମବିବିଏସ ପାଠପଢା ପାଇଁ ୨୫ ରୁ ୩୦ ଲକ୍ଷ ପର୍ଯ୍ୟନ୍ତ ଖର୍ଚ୍ଚ ହୋଇଥାଏ । ଅବଶ୍ୟ ସେଠାରେ ଏମ୍ବିବିଏସ ଆଡମିସନ ଏତେଟା ସହଜ ନୁହେଁ । ଭାରତର ଭିନ୍ନ ଭିନ୍ନ ପ୍ରାନ୍ତରେ ରହୁଥିବା ଛାତ୍ର ମାନେ ଏଜେଣ୍ଟ ମାନଙ୍କୁ ପ୍ରାୟ ଦେଢ଼ ରୁ ତିନି ଲକ୍ଷ ଟଙ୍କା ଦେଇ ୟୁକ୍ରେନ ମେଡିକାଲ ବିଶ୍ୱବିଦ୍ୟାଳୟରେ ଆଡମିସନ ନେଇଥାନ୍ତି । ଖୋଳତାଡ ପଚରାଉଚୁରାରୁ ଜଣାଯାଇଛିଯେ ସ୍ୱଦେଶରେ ସରକାରୀ କଲେଜ ଗୁଡିକରେ ଆଡମିସନ ନେବା କଷ୍ଟକର ହୋଇଥିବା ବେଳେ ବେସରକାରୀ କଲେଜ ଗୁଡିକର ଖର୍ଚ୍ଚ ବହନ କରିବା ମଧ୍ୟବିତ୍ତ ପରିବାର କ୍ଷେତ୍ରରେ ସେତେଟା ସହଜ ନୁହେଁ । ଭାରତର ପ୍ରାଇଭେଟ ମେଡିକାଲ କଲେଜରେ ପାଠପଢା ପାଇଁ ପାଞ୍ଚ ବର୍ଷ ପାଇଁ ପ୍ରାୟ ୯୦ ଲକ୍ଷ ପର୍ଯ୍ୟନ୍ତ ଖର୍ଚ୍ଚ ହୋଇଥାଏ ।
ଦେଖିବାକୁ ଗଲେ ଭାରତୀୟ ଛାତ୍ରମାନଙ୍କୁ ମେଡିକାଲ ପଢିବା ପାଇଁ ୟୁକ୍ରେନ ସୁବର୍ଣ୍ଣ ସୁଯୋଗ ଦେଉଛି । ସ୍ୱଦେଶରେ ପଢିବା ଅପେକ୍ଷା ପ୍ରାୟ ଅଧା ଖର୍ଚ୍ଚ ହୋଇଥାଏ । କେବଳଯେ ଭାରତର ନୁହେଁ ଅନ୍ୟ ଦେଶର ଛାତ୍ର ମାନଙ୍କୁ ବି ୟୁକ୍ରେନରେ ମେଡିକାଲ ପଢିବା ପାଇଁ ସୁଯୋଗ ମିଳିପାରୁଛି । ନାଇଜେରିୟା, ଘାନା କିମ୍ବା ଥାଇଲ୍ୟାଣ୍ଡ, ବିଶ୍ୱର ଅନ୍ୟ ଦେଶ ଗୁଡିକର ଛାତ୍ରମାନେ ବି ଏହି ଦେଶରେ ପଢିବା ପାଇଁ ସୁଯୋଗ ପାଇପାରୁଛନ୍ତି ।
