ଶ୍ରୀମନ୍ଦିରରେ ଲାଗିଲା ଫୋକସ୍ ଲାଇଟ୍, ଆଲୋକମାଳାରେ ଝଲସିଲା ଶ୍ରୀମନ୍ଦିର
ପୁରୀ: ପୁଣି ଫୋକସ୍ ଲାଇଟ୍ ରେ ଝଟକିବ ଶ୍ରୀମନ୍ଦିର । ଆଲୁଅରେ ଝଲସି ଉଠିବ ବଡ଼ ଦେଉଳ । ଆଲୋକମାଳାରେ ପ୍ରଭୁଙ୍କ କଳା ଶ୍ରୀମୁଖ ଚମକିବ । ଭକ୍ତ ଓ ସେବାୟତଙ୍କ ତୀବ୍ର ଅସନ୍ତୋଷ ପରେ ଶ୍ରୀମନ୍ଦିର ଚତୁଃପାର୍ଶ୍ୱରୁ ଅନ୍ଧାର ହଟି ଆଲୋକିତ ହୋଇଛି । ଜିଲ୍ଲା ପ୍ରଶାସନ ପକ୍ଷରୁ ଶ୍ରୀମନ୍ଦିର ଚାରିପଟେ ଉଜ୍ଜ୍ୱଳ ଆଲୋକ ଲଗାଇ ଦିଆଯାଇଛି ।
ସାଧାରଣ ନିର୍ବାଚନ-୨୦୨୪ର ଫଳ ଗତ ଜୁନ୍ ୪ ତାରିଖ ସନ୍ଧ୍ୟାରେ ଆସିବା ପରେ ଶ୍ରୀ ମନ୍ଦିରରୁ ଲାଇଟ୍ ଗୁଡ଼ିକୁ କାଢ଼ି ନିଆଯାଇଥିଲା । ଅନ୍ଧାର ହୋଇଯାଇଥିଲା ବିଶ୍ବ ପ୍ରସିଦ୍ଧ ଶ୍ରୀମନ୍ଦିରର ବାହାର ପାର୍ଶ୍ବ । ଆଜି ସଂଧ୍ୟା ପରଠାରୁ ଆଲୋକମାଳାରେ ପୁଣି ଝଲସି ଉଠିଛି । ଶ୍ରୀମନ୍ଦିର ଚର୍ତୁପାର୍ଶ୍ବରୁ ଅନ୍ଧାର ହଟି ଆଲୋକିତ ହୋଇଛି । ଶ୍ରୀମନ୍ଦିର ଆଲୋକମାଳାରେ ଝଲିସିବା ପରେ ଶ୍ରଦ୍ଧାଳୁ, ସେବାୟତ, ପୁରୀବାସୀଙ୍କ ମନରେ ଖୁସିର ଲହରି ଖେଳିଯାଇଛି ।
ତେବେ ଏହି ସାର୍ପୀ ଲାଇଟ୍ ଗୁଡ଼ିକ ଜିଲ୍ଲାପାଳଙ୍କ ନିର୍ଦ୍ଦେଶରେ ଏକ ଇଭେଣ୍ଟ ସଂସ୍ଥା ପୁନଃ ସଂସ୍ଥାପନ କରିଛି । ତୁରନ୍ତ ପଦକ୍ଷେପ ନେଇ ଏହାକୁ ସଂସ୍ଥାପନ କରାଯାଇଛି । ଏହି ଲାଇଟ୍ ଗୁଡ଼ିକୁ କାଢି ନେଇଥିଲା ଠିକାସଂସ୍ଥା । ଯାହାକୁ ନେଇ ଦେଖାଦେଇଥିଲା ଅସନ୍ତୋଷ । ଘଟଣାର ତଦନ୍ତ ସହ କାର୍ଯ୍ୟାନୁଷ୍ଠାନ ନେବାକୁ ପୁରୀ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଥିଲେ ମୁଖ୍ୟ ଶାସନ ସଚିବ । ସ୍ଥାୟୀ ସମାଧାନ ଓ ପୁନଃ ଆଲୋକୀକରଣ ବ୍ୟବସ୍ଥା ଦିଗରେ ପଦକ୍ଷେପ ନେବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଥିଲେ । ଯାହାଫଳରେ ଆଜି ଭୁବନେଶ୍ୱର ର ଏକ ଲାଇଟ ସଂସ୍ଥା ଶ୍ରୀ ମନ୍ଦିର କୁ ଆଲୋକୀକରଣ କରିବା ଲାଗି ଲାଇଟ ସ୍ଥାପନ କରିଛନ୍ତି l
ପରିକ୍ରମା ପ୍ରକଳ୍ପ ଲୋକାର୍ପଣ ସମୟରେ ଶ୍ରୀମନ୍ଦିରକୁ ସମ୍ପୂର୍ଣ୍ଣ ଆଲୋକୀକରଣ କରାଯାଇଥିଲା । ମନ୍ଦିର ଚାରିପାର୍ଶ୍ୱରେ ଏକାଧିକ ଲାଇଟ୍ ଲଗାଯାଇଥିଲା । ଉତ୍ତର ଦ୍ୱାର, ଦକ୍ଷିଣଦ୍ୱାର, ପଶ୍ଚିମଦ୍ୱାରରେ ବକ୍ସ ଭଳି ଏକାଧିକ ସ୍ଥାନରେ ବଡ଼ ବଡ଼ ଫୋକସିଂ ଲାଇଟ୍ ସବୁ ଲାଗିଥିଲା । ଯାହା ଫଳରେ ଶ୍ରୀମନ୍ଦିର ସୌନ୍ଦର୍ଯ୍ୟ ରାତିରେ ମଧ୍ୟ ଦୂରକୁ ସ୍ପଷ୍ଟ ଦେଖା ଯାଉଥିଲା । କିନ୍ତୁ ପୂର୍ବ ରୁ ଲାଗିଥିବା ଲାଇଟକୁ କଢ଼ା ଯିବା ଫଳରେ ସାଧାରଣ ରେ ଅନେକ ଅସନ୍ତୋଷ ଦେଖା ଦେଇଥିଲା l
