ଚା’ କେବଳ ଏକ ପାନୀୟ ନୁହେଁ। ଏହା ଜଡିତ ଥାଏ ଅନେକଙ୍କ ଭାବନା ସହିତ। ଖାସ କରି ଭାରତରେ ସକାଳ ଆରମ୍ଭ ହୁଏ ଏଇ କପେ ଚା’ ରୁ ଆଉ ସନ୍ଧ୍ୟା ଶେଷ ହୁଏ ଏଇ କପେ ଚା’ ରୁ। କିଛି ଲୋକ ଏମିତି ବି ଅଛନ୍ତି ଯେଉଁମାନେ ବିନା ଚା’ ରେ ରହି ପାରିବେନି। ଯେଉଁମାନଙ୍କ ମଧ୍ୟରେ ହୁଏତ ଆପଣ ବି ଥାଇ ପାରନ୍ତି। ଆପଣ ପିଉ ଥିବା ଚା’ ର ଦାମ୍ ଏମିତି କେତେ ହୋଇଥିବ? ୫ କିମ୍ୱା ୧୫ ଟଙ୍କା। କିନ୍ତୁ ଆପଣ କଣ ଜାଣିଛନ୍ତି କି, ଦୁନିଆରେ ଏମିତି ଚା’ ଅଛି ଯାହାର ଦାମ୍ ରହିଛି କୋଟିଏ ଟଙ୍କାରୁ ଅଧିକ। ହୁଏତ ଏହା ଆପଣଙ୍କୁ ଆଶ୍ଚର୍ଯ୍ୟ ଲାଗିପାରେ। କାରଣ ସେତିକି ଟଙ୍କାରେ ଜଣେ ଘର କିଣି ପାରିବ ଆଉ କାର ମଧ୍ୟ।
ତେବେ ଆଜି ଆସନ୍ତୁ ଜାଣିବା ଦୁନିଆର ମହଙ୍ଗା ଚା’ ବିଷୟରେ। ଦୁନିଆରେ ଏମିତି ଚା’ ଅଛି ଯାହାର ଦାମ୍ କାର ଅପେକ୍ଷା ମହଙ୍ଗା। ତେବେ ଏହି ଚା’ ର ଭଲ ଉପକାରିତା ଗୁଣ ମଧ୍ୟ ରହିଛି। ତେବେ କେବଳ ଭାରତ ନୁହେଁ, ଭାରତରୁ ଆରମ୍ଭ କରି ଜାପାନ ଏବଂ ଚୀନ୍ ରୁ ତୁର୍କୀ ପର୍ଯ୍ୟନ୍ତ ସମସ୍ତେ ଚା’ର ସ୍ୱାଦକୁ ଭଲ ପାଆନ୍ତି। କିନ୍ତୁ ଆପଣ ଜାଣନ୍ତି କି ଚା’ର ଅନେକ ବଡ଼ ବ୍ରାଣ୍ଡ ଅଛି ଯାହା ସ୍ୱତନ୍ତ୍ର ଭାବେ ପ୍ରସ୍ତୁତ କରାଯାଏ। ଏହି ଚା’ ଚାଷ ବହୁତ ଯତ୍ନର ସହିତ କରାଯାଇଥାଏ ଏବଂ ଏହାର ମୂଲ୍ୟ ଏତେ ଯେ ସମସ୍ତେ ଏହାକୁ ପିଇବା ଏତେ ସହଜ ନୁହେଁ।
ଡା-ହଙ୍ଗ ପାଓ ଚା(Da- Hong Pao Tea):
ପ୍ରଥମେ ଏହି ମହଙ୍ଗା ଚା’ ଲିଷ୍ଟରେ ଆସୁଛି ଚାଇନାରେ ଉତ୍ପାଦନ ହେଉଥିବା ଡା-ହଙ୍ଗ ପାଓ ଚା। ଏହି ଚା’ ଦୁନିଆର ସବୁଠାରୁ ମହଙ୍ଗା ଚା’, ଯାହା ଚାଇନାର ଫୁଜିଆନ୍ ପ୍ରଦେଶର ୱୁଇ ପର୍ବତରେ ଚାଷ କରାଯାଏ। କେବଳ ଏତିକି ନୁହେଁ, ଏହାର ବିରଳତା ଯୋଗୁଁ ଏହାକୁ ଏକ ଜାତୀୟ ଭଣ୍ଡାର ଭାବେ ଘୋଷଣା କରାଯାଇଛି। ଏହାର ମୂଲ୍ୟ କିଲୋଗ୍ରାମ ପିଛା ପ୍ରାୟ ୧.୨ ମିଲିୟନ୍ ଡଲାର୍ ଅର୍ଥାତ୍ ୯ କୋଟି ଟଙ୍କାରୁ ଅଧିକ। ଏଥିରେ ଅନେକ ଭଲ ଗୁଣ ରହିଛି।
Panda Dung Tea:
ଦ୍ୱିତୀୟ ମହଙ୍ଗା ଚା’ ବିଷୟରେ କହିବାକୁ ଗଲେ ଏହା ଚାଇନାରୁ ମଧ୍ୟ ଆସିଥାଏ। ଏହାର ନାମ ପଣ୍ଡା-ଡଙ୍ଗ ଚା’। ଯଦି ଆପଣ ପ୍ରଶ୍ନ କରୁଛନ୍ତି ଯେ ଏହି ଚା କାହିଁକି ଏପରି ନାମ ପାଇଲା, ତେବେ ଏହି ଚା ଚାଷରେ ପାଣ୍ଡା ଭାଲୁ ଗୋବର ସାର ଭାବରେ ବ୍ୟବହୃତ ହୁଏ। ତେଣୁ ଏହାର ନାମ ଏପରି ରହିଛି। ଏହି ଚା’ ପ୍ରଥମେ ଦକ୍ଷିଣ-ପଶ୍ଚିମ ଚାଇନାର ଉଦ୍ୟୋଗୀ ଆନ୍ ୟାନସିଙ୍କ ଦ୍ୱାରା ଚାଷ କରାଯାଇଥିଲା। ରିପୋର୍ଟ ଅନୁଯାୟୀ, ଏଥିରେ ଅନେକ ଆଣ୍ଟିଅକ୍ସିଡାଣ୍ଟ ଗୁଣ ରହିଛି ଯାହା ଅନେକ ସ୍ୱାସ୍ଥ୍ୟ ଉପକାର କରିଥାଏ। ଏହାର କିଲୋ ପାଇଁ ଆପଣଙ୍କୁ ପ୍ରାୟ ୭୦ ହଜାର ଡଲାର ଅର୍ଥାତ୍ ୫୭ ଲକ୍ଷରୁ ଅଧିକ ଖର୍ଚ୍ଚ କରିବାକୁ ପଡିବ।
Yellow Gold Tea Buds:
ଦୁନିଆର ତୃତୀୟ ମହଙ୍ଗା ଚା’ ସିଙ୍ଗାପୁରରୁ ଆସିଛି, ଯାହାର ନାମ ୟେଲୋ ଗୋଲ୍ଡ ଟି ବଡ୍ସ। ଏହା ଏକ ବିରଳ ଚା’ ବିରଳ, ଯାହାର ପତ୍ର ସୁନା ଭଳି ଚାମକୁ ଥାଏ। ବିଶେଷ କଥା ହେଉଛି ଏହାର ଚାଷ ସମୟରେ ଏହାର ପତ୍ର ବର୍ଷକୁ ଥରେ କଟାଯାଏ। କେବଳ ଏତିକି ନୁହେଁ, ଏହା ସୁନାର ଦା’ ରେ କଟାଯାଇଥାଏ। ଏହା ଚାଇନାର ସମ୍ରାଟମାନଙ୍କର ଚା ’ଭାବେ ଜଣାଶୁଣା। ଏହାର ପତ୍ର କାଟିବା ପରେ ଖରାରେ ଶୁଖାଯାଏ, ତା’ପରେ ଖାଇବା ପୂର୍ବରୁ ଏଥିରେ ୨୪-କ୍ୟାରାଟ ସୁନା ଖଣ୍ଡ ମଧ୍ୟ ଏହି ପତ୍ର ଉପରେ ଛିଞ୍ଚି ଦିଆଯାଏ। ଏହି ଚା’ର ମୂଲ୍ୟ କିଲୋଗ୍ରାମ ପିଛା ପ୍ରାୟ ୭,୮୦୦ ଡଲାର ଅର୍ଥାତ୍ ୬ ଲକ୍ଷରୁ ଅଧିକ।
Silver Tips Imperial Tea:
ଏହି ସିଲଭର ଟିପ୍ସ ଇମ୍ପେରିଆଲ୍ ଚା’ ମଧ୍ୟ ଖୁବ୍ ମାହାଙ୍ଗା। ଏହାର ବିଶେଷ କଥା ହେଉଛି କେବଳ ପୂର୍ଣ୍ଣିମା ରାତିରେ ଏହି ଚା’ ପତ୍ର କଟାଯାଏ। ତାହା ପୁଣି କେବଳ ବିଶେଷଜ୍ଞଙ୍କ ଦ୍ଵାରା। ଏହା ଦାର୍ଜିଲିଂର ପାହାଡ ଉପରେ ଥିବା ମାକାବାରି ଚା’ ଇଷ୍ଟେଟରେ ଅମଳ ହୋଇଥିବା ଏକ ପ୍ରକାର ଓଲଙ୍ଗ ଚା’। ଏହା ହେଉଛି ଭାରତର ସବୁଠାରୁ ମହଙ୍ଗା ଚା’, ଯାହା ୨୦୧୪ ରେ ନିଲାମ ସମୟରେ କିଲୋଗ୍ରାମ ପିଛା ୧,୮୫୦ ଡଲାର ଅର୍ଥାତ୍ ୧ ଲକ୍ଷ ୫୦ ହଜାର ୭୨୪ ଟଙ୍କାରେ ବିକ୍ରି ହୋଇଥିଲା।
ଗାଇକୁରୋ (Gyokuro) :
ତେବେ ଏହି ଲିଷ୍ଟରେ ପଞ୍ଚମ ସ୍ଥାନରେ ରହିଛି ଜାପାନର ଗାଇକୁରୋ ଚା’, ଯାହା ହେଉଛି ଗ୍ରୀନ ଟି। ଗାଇକୁରୋ ଚା’ ବା ଗ୍ରୀନ୍ ଟି’ କୁ ସର୍ବୋଚ୍ଚ ଗ୍ରେଡ୍ ଭାବରେ ବିବେଚନା କରାଯାଏ। ଗାଇକୁରୋ ଚା’ ପ୍ରଥମେ ୧୮୩୫ ମସିହାରେ କାହି ୟାମାମୋଟୋ ଷଷ୍ଠ ଦ୍ୱାରା ଆବିଷ୍କୃତ ହୋଇଥିଲା। ଏହି ଚା’ର ମୂଲ୍ୟ ବିଷୟରେ କହିବାକୁ ଗଲେ ଏହା କିଲୋଗ୍ରାମ ପିଛା ପ୍ରାୟ ୬୫୦ ଡଲାର ଅର୍ଥାତ୍ ୫୨ ହଜାର ୯୬୦ ଟଙ୍କା।