ପାଇଲଟଙ୍କ ହାର୍ଟଆଟାକ ପରେ ସମବେଦନା ଜଣାଇଲା LATAM ଏୟାରଲାଇନ୍ସ
ହଠାତ ଫ୍ଲାଇଟରେ ପାଇଲଟଙ୍କ ସ୍ୱାସ୍ଥ୍ୟ ବିଗିଡ଼ି ଯାଇଥିଲା ଏବଂ ସେ ବାଥରୁମରେ ହିଁ ହୃଦଘାତର ଶିକାର ହୋଇଥିଲେ । ଏହା ପରେ ଫ୍ଲାଇଟର ଏମର୍ଜେନ୍ସି ଲ୍ୟାଣ୍ଡ କରିବାକୁ ପଡ଼ିଥିଲା । ପାଇଲଟ ଇଭାନ ଆଣ୍ଡୋର ବେହୋସ ହେବା ପରେ ଫ୍ଲାଇଟରେ ଉପସ୍ଥିତ ଥିବା କୋ-ପାଇଲଟ ଏହାର ଏମର୍ଜେନ୍ସି ଲ୍ୟାଣ୍ଡିଂ କରାଇଥିଲେ ।
ମୃତ୍ୟୁ କେତେବେଳେ ଆସେ କେହି ବି କହି ପାରିବେନି । ଏହା ପାଇଁ କୌଣସି ନିଶ୍ଚିତ ସ୍ଥାନ କି ସମୟ ନଥାଏ । ତେବେ ବିମାନ ଯାତ୍ରା କରୁଥିବା ସମୟରେ ଅନେକ ଯାତ୍ରୀଙ୍କ ମୃତ୍ୟୁ ହେବା ଖବର ତ ଆପଣ ଶୁଣିଥିବେ । କିନ୍ତୁ ଯଦି ବିମାନର ପାଇଲଟର ମୃତ୍ୟୁ ହୋଇଯାଏ ତେବେ ଯାତ୍ରୀଙ୍କର କଣ ହେବ । କିନ୍ତୁ ଏଭଳି ଏକ ଅଭାବନୀୟ ଘଟଣା ସତରେ ଘଟିଛି । ଫ୍ଲାଇଟରେ ହିଁ ପାଇଲଟଙ୍କ ମୃତ୍ୟୁ ହୋଇଥିବା ଖବର ସାମ୍ନାକୁ ଆସିଛି । ୨୭୧ ଜଣ ଯାତ୍ରୀ ଫ୍ଲାଇଟରେ ଯାତ୍ରା କରୁଥିବା ସମୟରେ ହିଁ ଏଭଳି ଅଭାବନୀୟ ଘଟଣା ଘଟିଥିବା ଜଣା ପଡ଼ିଛି ।
ଏହି ଫ୍ଲାଇଟ ଆମେରିକାର ଫ୍ଲୋରିଡାରୁ ଚିଲି ଯାଉଥିଲା । ଠିକ ଏହି ସମୟରେ ହଠାତ ଫ୍ଲାଇଟରେ ପାଇଲଟଙ୍କ ସ୍ୱାସ୍ଥ୍ୟ ବିଗିଡ଼ି ଯାଇଥିଲା ଏବଂ ସେ ବାଥରୁମରେ ହିଁ ହୃଦଘାତର ଶିକାର ହୋଇଥିଲେ । ଏହା ପରେ ଫ୍ଲାଇଟର ଏମର୍ଜେନ୍ସି ଲ୍ୟାଣ୍ଡ କରିବାକୁ ପଡ଼ିଥିଲା । ରିପୋର୍ଟ ଅନୁଯାୟୀ ପାଇଲଟଙ୍କ ନାମ ହେଉଛି କ୍ୟାପଟେନ ଇଭାନ ଆଣ୍ଡୋର, ମୃତ୍ୟୁ ସମୟରେ ତାଙ୍କୁ ୫୬ ବର୍ଷ ବୟସ ହୋଇଥିଲା ।
ଫ୍ଲାଇଟ ଫ୍ଲୋରିଡାରୁ ସାଣ୍ଟିୟାଗୋ ପାଇଁ ଉଡ଼ାଣ ଭରିବା ପରେ LATAM ଏୟାରଲାଇନ୍ସର ଫ୍ଲାଇଟରେ ଇଭାନଙ୍କୁ ୩ ଘଣ୍ଟା ପରେ ଅସୁସ୍ଥତା ଅନୁଭବ ହୋଇଥିଲା । ପରେ ବାଥରୁମରେ ହିଁ ପଡ଼ି ସେ ବେହୋସ ହୋଇଯାଇଥିଲେ । ପାଇଲଟଙ୍କୁ ଏଭଳି ଅବସ୍ଥାରେ ଦେଖି ଏୟାରଲାଇନ୍ସର ଅନ୍ୟ କ୍ରୁ ମେମ୍ବର୍ସ ଜରୁରୀକାଳୀନ ଚିକିତ୍ସା କରିବାକୁ ଲାଗିଥିଲେ । କିନ୍ତୁ ସମସ୍ତ ଚେଷ୍ଟା ପରେ ମଧ୍ୟ ସେ ବଞ୍ଚି ନଥିଲେ । ତେଣୁ ଫ୍ଲାଇଟକୁ ଏମର୍ଜେନ୍ସି ଲ୍ୟାଣ୍ଡିଂ କରିବାକୁ ପଡ଼ିଥିଲା । ବିମାନକୁ ପାନାମା ସହରର ଟୋକ୍ୟୁମେନ ଆନ୍ତର୍ଜାତୀୟ ବିମାନବନ୍ଦରରେ ଜରୁରୀକାଳୀନ ଅବତରଣ କରାଯାଇଥିଲା । ପରେ ତାଙ୍କୁ ନିକଟସ୍ଥ ହସ୍ପିଟାଲକୁ ନିଆଯାଇଥିଲା ଯେଉଁଠାରେ ଡାକ୍ତରମାନେ ପାଇଲଟଙ୍କୁ ମୃତ ଘୋଷଣା କରିଥିଲେ ।
ପାଇଲଟ ଇଭାନ ଆଣ୍ଡୋର ବେହୋସ ହେବା ପରେ ଫ୍ଲାଇଟରେ ଉପସ୍ଥିତ ଥିବା କୋ- ପାଇଲଟ ଏହାର ଏମର୍ଜେନ୍ସି ଲ୍ୟାଣ୍ଡିଂ କରାଇଥିଲେ । ଏହି ଘଟଣା ପରେ ଏୟାରଲାଇନ୍ସ ଏକ ବୟାନ ଜାରି କରିଛି । ନିଜ ବୟାନରେ ଏୟାରଲାଇନ୍ସ କହିଛି ଯେ, LATAM ଏୟାରଲାଇନ୍ସର ରିପୋର୍ଟ ଅନୁସାରେ ୧୪ ଅଗଷ୍ଟରେ ଫ୍ଲାଇଟ ମିଆମିରୁ ସାଣ୍ଟିୟାଗୋ ଯାଉଥିଲା । କିନ୍ତୁ ପାଇଲଟଙ୍କ ଅସୁସ୍ଥତା କାରଣରୁ ଏହାକୁ ଏମର୍ଜେନ୍ସି ଲ୍ୟାଣ୍ଡିଂ କରିବାକୁ ପଡ଼ିଥିଲା । ପାଇଲଟଙ୍କ ଜୀବନ ବଞ୍ଚାଇବା ପାଇଁ ସମସ୍ତ ପ୍ରୋଟୋକଲ ଅନୁସରଣ କରାଯାଇଥିଲା । କିନ୍ତୁ ଦୁଃଖର ବିଷୟ ସମସ୍ତ ଚେଷ୍ଟା ସତ୍ତ୍ୱେ ତାଙ୍କ ଜୀବନ ବଞ୍ଚାଯାଇ ପାରି ନଥିଲା ।
ନିଜ ବୟାନରେ ଏୟାରଲାଇନ୍ସ ଏହା ମଧ୍ୟ କହିଛି ଯେ, ଯାହା କିଛି ବି ହୋଇଛି ତାହା ସମସ୍ତଙ୍କୁ ପ୍ରଭାବିତ କରିଛି ଏବଂ ଆମେ ଆମ କର୍ମଚାରୀଙ୍କ ପରିବାରକୁ ସମବେଦନା ଜଣାଉଛୁ । ତାଙ୍କର ୨୫ ବର୍ଷ କ୍ୟାରିଅର ଏବଂ ବହୁମୂଲ୍ୟ ଯୋଗଦାନ ପାଇଁ ଆମେ କୃତଜ୍ଞ ଅଛୁ । ସେ ସର୍ବଦା ତାଙ୍କ କାମ ପାଇଁ ପ୍ରତିଷ୍ଠା ଓ ସମର୍ପଣ ଭାବନା ଦେଖାଇଥିଲେ । ତେବେ ଉଡ଼ାଣ ସମୟରେ ପାଇଲଟଙ୍କ ଜୀବନ ବଞ୍ଚାଇବା ପାଇଁ ସମସ୍ତ ଆବଶ୍ୟକ ସୁରକ୍ଷା ପ୍ରୋଟୋକଲ ଅନୁସରଣ କରାଯାଇଥିଲା । କିନ୍ତୁ ତାଙ୍କୁ ବଞ୍ଚାଯାଇ ପାରିଲା ନାହିଁ ।
