ରଣଜୀ ମ୍ୟାଚ୍ : ହାତରେ ୫ ଓ୍ଵିକେଟ୍, ଶେଷ ଦିନରେ ଜିତିବା ପାଇଁ ଓଡ଼ିଶାକୁ ଦରକାର ୧୦୪ ରନ୍
କଟକ (କେ ନ୍ୟୁଜ୍) : ମଣିଶଙ୍କର ମୁରାସିଂହଙ୍କ ଅଲ୍ରାଉଣ୍ଡ ସଫଳତା ତ୍ରିପୁରା ସହ ରଣଜୀ ମ୍ୟାଚ୍ରେ ଓଡ଼ିଶାର ସ୍ଥିତି ଖରାପ କରି ଦେଇଛି । ଚମତ୍କାର ବ୍ୟାଟିଂ ପରେ ବୋଲିଂରେ ଝଡ଼ାଇ ଦେଇଛନ୍ତି ଘରୋଇ ଦଳର ୪ଟି ଓ୍ଵିକେଟ୍ । ଟାଙ୍ଗି ସ୍ଥିତ ଡ୍ରିମସ୍ ପଡ଼ିଆରେ ଚାଲିଥିବା ରଣଜୀ ମ୍ୟାଚରେ ତ୍ରିପୁରା ଦଳ ଘରୋଇ ଓଡ଼ିଶା ଆଗରେ ୨୧୫ ରନ୍ର ବିଜୟ ଲକ୍ଷ୍ୟ ରଖିଛି । ଆଜି ତୃତୀୟ ଦିନ ଖେଳ ଶେଷ ସୁଦ୍ଧା ଓଡ଼ିଶା ତାର ପ୍ରମୁଖ ୫ଜଣ ବ୍ୟାଟ୍ସମ୍ୟାନ୍ଙ୍କୁ ହରାଇ ୧୧୧ ରନ୍ କରିଛି । ବର୍ତ୍ତମାନ ସ୍ଥିତିରେ ଉଭୟ ଜିତିବା ଓ ହାରିବାର ସମ୍ଭାବନା ରହିଛି ଘରୋଇ ଦଳ ପାଇଁ । କେବଳ ସ୍ପେସାଲିଷ୍ଟ ବ୍ୟାଟ୍ସମ୍ୟାନ୍ ଭାବେ ଶୁଭ୍ରାଂଶୁ ସେନାପତି ୪୩ ରନ୍ କରି ଅପରାଜିତ ଅଛନ୍ତି । ତାଙ୍କ ସହ ୨୦ ରନ୍ରେ ବ୍ୟାଟିଂ କରୁଛନ୍ତି ଅଭିଷେକ ରାଉତ । ଅନୁରାଗ ଷଡ଼ଙ୍ଗୀ, ଗୋବିନ୍ଦ ପୋଦ୍ଦାର ଓ ଅଧିନାୟକ ବିପ୍ଳବ ସାମନ୍ତରାୟ ପୂରା ଫ୍ଲପ୍ ମାରିଲେ ।
ଗତକାଲି ଖେଳ ଶେଷ ସୁଦ୍ଧା ତ୍ରିପୁରା ଦଳ ୫ ଓ୍ଵିକେଟ୍ରେ ୧୩୦ ରନ୍ କରିଥିଲା । ଆଜି କିନ୍ତୁ ଶେଷଭାଗ ବ୍ୟାଟ୍ସମ୍ୟାନ୍ମାନେ ଓଡ଼ିଶା ବୋଲରଙ୍କୁ ପାଣି ପିଆଇ ଦେଇଥିଲେ । ବାକି ୫ଟି ଓ୍ଵିକେଟ୍ ବିନିମୟରେ ୨୭୩ ରନ୍ ସଂଗ୍ରହ କରିଥିଲା ଦଳ । ରାଣାଦତ୍ତ (୨୯) ଓ ହରମିତ ସିଂହ ଅଷ୍ଟମ ଓ୍ଵିକେଟ୍ରେ ୮୪ ରନ୍ ଯୋଡ଼ିଥିଲେ । ଏମାନଙ୍କ ଯୋଗୁଁ ତ୍ରିପୁରା ୩୦୦ ରନ୍ ଟପିବାକୁ ସମର୍ଥ ହୋଇଥିଲା । ଆଠ ନମ୍ବର ବ୍ୟାଟ୍ସମ୍ୟାନ୍ ମଣିଶଙ୍କର ମୁରାସିଂହ ୭୫ ରନ୍ (୧୩ ଚୌକା ଓ ୧ ଛକା) ଏବଂ ନଅ ନମ୍ବର ବ୍ୟାଟସମ୍ୟାନ୍ ହରମିତ ସିଂହ ୪୬ ବଲ୍ରୁ ୪୨ ରନ୍ ସ୍କୋର କରିଥିଲେ । ଫଳରେ ଦ୍ୱିତୀୟ ଇନିଂସ୍ରେ ତ୍ରିପୁରା ଟିମ୍ ୩୦୪ ରନ୍ କରି ଅଲ୍ଆଉଟ୍ ହୋଇଥିଲା । ଓଡ଼ିଶାର ଅଭିଜ୍ଞ ପେସ୍ ବୋଲର୍ ବସନ୍ତ ମହାନ୍ତି ୪ଟି ଓ୍ଵିକେଟ୍ ଦଖଲ କରିଥିଲେ ମଧ୍ୟ ତ୍ରିପୁରା ବ୍ୟାଟ୍ସମ୍ୟାନ୍ଙ୍କୁ ଶୀଘ୍ର ପାଭିଲିଆନ୍ ଫେରାଇ ଦେଇ ପାରି ନଥିଲେ । ସେହିପରି ରାଜେଶ ମହାନ୍ତିଙ୍କୁ ୪ ଓ୍ଵିକେଟ୍ ମିଳିଛି ।
ସ୍କୋର : ତ୍ରିପୁରା ପ୍ରଥମ ଇନିଂସ୍-୧୨୨ । ଦ୍ୱିତୀୟ ଇନିଂସ୍-୩୦୪, ୯୧.୩ ଓଭର (ବିଶାଲ ଘୋଷ ୪୮, ସ୍ମିତ ପଟେଲ ୨୯, ପ୍ରତ୍ୟୁଷ ସିଂହ ୩୨, ରାଣା ଦତ୍ତ ୨୯, ମଣିଶଙ୍କର ୭୫, ହରମିତ ସିଂହ ୪୨ । ବସନ୍ତ ମହାନ୍ତି ୨୫.୩-୯-୫୩-୪, ରାଜେଶ ମହାନ୍ତି ୨୫-୩-୯୪-୪)ା
ଓଡ଼ିଶା ପ୍ରଥମ ଇନିଂସ୍ : ୨୧୨ । ଦ୍ୱିତୀୟ ଇନିଂସ୍ : ୧୧୧/୫,୩୮ ଓଭର (ରାଜେଶ ଧୁପର ୩୭, ଶୁଭ୍ରାଂଶୁ ସେନାପତି ଅପରାଜିତ ୪୩ । ମଣିଶଙ୍କର ୧୨-୧-୩୭-୪) ।
