ଉତ୍ତର-ପଶ୍ଚିମ ବଙ୍ଗୋପସାଗରରେ ଆଉ ଏକ ଲଘୁଚାପ, ପୁଣି ବଢିପାରେ ବର୍ଷା ପରିମାଣ
ଆସୁଛି ଆଉ ଏକ ଲଘୁଚାପ। ୨୩ ତାରିଖରେ ଉତ୍ତର -ପଶ୍ଚିମ ବଙ୍ଗୋପସାଗରରେ ଆଉ ଏକ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି। ଏହା ପରେ ପୁଣି ବର୍ଷା ପରିମାଣ ଆହୁରି ବଢିପାରେ। ଲଘୁଚାପ ପ୍ରଭାବରେ ଗତକାଲିଠାରୁ ରାଜ୍ୟର ବିଭିନ୍ନ ସ୍ଥାନରେ ଘଡଘଡି ସହ ବର୍ଷା ହୋଇଛି। ଭୁବନେଶ୍ୱର, ଛତ୍ରପୁର ଓ କଟକରେ ପ୍ରବଳ ବର୍ଷା ହୋଇଛି। ଆଜି ୧୬ ଜିଲ୍ଲାରେ ପ୍ରବଳ ବର୍ଷା ସମ୍ଭାବନା ରହିଥିବା ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି।
ଗତକାଲି କେଇ ଘଣ୍ଟାର ବର୍ଷାରେ ଉବୁଟୁବୁ ହୋଇଥିଲା ରାଜଧାନୀ ଭୁବନେଶ୍ୱର । ବିଭିନ୍ନ ସ୍ଥାନରେ ରାସ୍ତାରେ ଲହଡ଼ି ମାରିଥିଲା ପାଣି । ସନ୍ଧ୍ୟା ସାଢେ ୭ଟା ସୁଦ୍ଧା ଭୁବନେଶ୍ୱର ରାଜଭବନ ପାର୍ଶ୍ୱବର୍ତ୍ତୀ ଅଞ୍ଚଳରେ ୭୭.୫ ମିଲିମିଟର ବର୍ଷା ରେକର୍ଡ ହୋଇଥିବାବେଳେ ବିମାନବନ୍ଦର ଇଲାକାରେ ୭୫.୫ ମିଲିମିଟର ବର୍ଷା ହୋଇଥିଲା। କଟକରେ ୩୭ ମିଲିମିଟର ବର୍ଷା ରେକର୍ଡ କରାଯାଇଥିଲା।
