ଦୁର୍ଘଟଣା ଏମିତି ହେଲା ଯେ ଏକା ସାଙ୍ଗେ ଚାଲିଗଲେ ସ୍ୱାମୀ ସ୍ତ୍ରୀ
ମାଲକାନଗିରି (କେନ୍ୟୁଜ୍) : ବାଇକ୍ରେ ଆସୁଥିଲେ ସ୍ୱାମୀ ସ୍ତ୍ରୀ । ଟିପର ସାମନାରେ ପଡ଼ିଗଲେ । ଆଉ ଟିପର ଏମିତି ଧକ୍କା ଦେଲା ଯେ ସେଇଠି ଉଜୁଡ଼ିଗଲା ଗୋଟିଏ ସଂସାର । ମାଲକାନଗିରି ଜିଲ୍ଲା କରୁକୋଣ୍ଡା ଗାଁର ଶିବ ମନ୍ଦିର ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଟିପ୍ପର ଧକ୍କାରେ ବାଇକରେ ଯାଉଥିବା ସ୍ୱାମୀ ସ୍ତ୍ରୀ ଦୁହିଁଙ୍କର ମୃତ୍ୟୁ ଘଟିଛି।
ଏହି ଦମ୍ପତି ମାଲକାନଗିରିରୁ ବାଲିମେଳା ଅଭିମୁଖେ ବାଇକ ଯୋଗେ ଯାଉଥିଲେ । ସେତିକି ବେଳେ ସାମ୍ନାରୁ ଆସୁଥିବା ଟିପ୍ପରକୁ ଦେଖି ବାଇକ ଆରୋହୀ ଭାରସାମ୍ଯ ହରାଇବାରୁ ଦୁର୍ଘଟଣା ଘଟିଥିବା କୁହାଯାଉଛି ।
ସ୍ଥାନୀୟ ଲୋକଙ୍କ ସହାୟତାରେ ଗୁରୁତର ଆହତ ଅବସ୍ଥାରେ ସ୍ୱାମୀ ସ୍ତ୍ରୀଙ୍କୁ ଆମ୍ବୁଲାନ୍ସ ଯୋଗେ ମାଲକାନଗିରି ମୁଖ୍ଯ ଚିକିତ୍ସାଳୟକୁ ନିଆଯାଇଥିଲା । ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ମୃତ ଦମ୍ପତି ଏମ୍ପିଭି-୭୫ ଗାଁର ବୋଲି ଜଣାପଡିଛି। ସ୍ୱାମୀ ହେଉଛନ୍ତି ୬୫ ବର୍ଷ ବୟସ୍କ ଭବେଶ ସିକଦାର ଏବଂ ତାଙ୍କ ପତ୍ନୀ ହେଉଛନ୍ତି ୬୦ ବର୍ଷ ବୟସ୍କା କଳ୍ପନା ସିକଦାର। ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରୁଛି।
