ଚିଲିକା ମଝିରେ କାଳ ବୈଶାଖୀର ତାଣ୍ଡବ: ବୁଡିଲା ମତ୍ସ୍ୟଜୀବୀଙ୍କ ଡଙ୍ଗା, ଅଳ୍ପକେ ବର୍ତ୍ତିଲେ ଧୀବର
ଟାଙ୍ଗୀ(କେନ୍ୟୁଜ୍): କାଳ ବୈଶାଖୀର ପ୍ରଭାଵରେ ଚିଲିକାରେ ବୁଡିଲା ମାଛ ମରା ଡଙ୍ଗା । ଅଳ୍ପକେ ବର୍ତ୍ତିଲେ ମତ୍ସ୍ୟଜୀବୀ। ଘଟଣା ଘଟିଛି ଚିଲିକାର ୪ ନଂ କୁଦ ନିକଟରେ । ସବୁ ଦିନ ଭଳି ଗତ କାଲି ଚିଲିକାରେ ମତ୍ସ୍ୟଜୀବୀମାନେ ମାଛ ମାରିବା ପାଇଁ ଯାଇଥିଲେ । ମାଛ ମାରିବା ପାଇଁ ଜାଲ ଖନ୍ଦା ବସାଇ ସାରିବା ପରେ ମତ୍ସ୍ୟଜୀବୀମାନେ ରାତି ପ୍ରାୟ ୯ଟା ସମୟରେ ଖାଇ ପିଇ ଡଙ୍ଗାରେ ବିଶ୍ରାମ ନେଉଥିଲେ । ହଠାତ୍ ଚିଲିକା ମଧ୍ୟରେ ପବନର ବେଗ ବଢିବାରେ ଲାଗିଲା । ପବନର ବେଗ ବେଳକୁ ବେଳ ବଢି ପ୍ରଳୟୀର ରୂପ ନେଲା। ଯାହା ଫଳରେ ଜାଲ ଗୁଡିକ ଭାଷି ଯିବା ସହ ଡଙ୍ଗା ଗୁଡିକରେ ପାଣି ପଶିବାକୁ ଲାଗିଲା । ପାଣି ପଶିବା ଫଳରେ ଡଙ୍ଗା ଗୁଡିକ ଚିଲିକାରେ ବୁଡିବାକୁ ଲାଗିଲା ।
ଫଳରେ ମତ୍ସ୍ୟଜୀବୀମାନେ ନିଜ ଜୀବନ ବଞ୍ଚାଇବାକୁ ଯାଇ ଭେଳା ପଟାକୁ ଆଶ୍ରା କରି ଚିଲିକାର ଅଥଳ ଜଳ ରାଶିରେ ପହଁରିବାକୁ ଲାଗିଲେ । ମତ୍ସ୍ୟଜୀବୀମାନେ ନିରାପଦରେ ଘରକୁ ଫେରିଥିବା ବେଳେ ଅନେକ ମତ୍ସ୍ୟଜୀବୀମାନଙ୍କର ଡଙ୍ଗା ଏବେ ଚିଲିକାରେ ବୁଡି ରହିଥିବା ଜଣା ପଡିଛି । ତେବେ ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଜରିପଡା ପାଣି ଦ୍ୱାର ଗ୍ରାମର ମତ୍ସ୍ୟଜୀବୀ ଅଶୋକ ବେହେରାଙ୍କର ଡଙ୍ଗା ବୁଡି ଯାଇଥିବା ଜଣା ପଡିଛି । ପୁରୀ ଜିଲ୍ଲା ୪ନଂ କୁଦର ପଶ୍ଚିମ ପଟେ ଡଙ୍ଗାଟି ବୁଡି ରହିଛି । ୩୦ରୁ ଅଧିକ ମତ୍ସ୍ୟଜୀବୀ ୫ ରୁ ୬ଟି ମୋଟର ବୋଟ୍ ନେଇ ବୁଡିଥିବା ଡଙ୍ଗାକୁ ଉଦ୍ଧାର କରିବା ପାଇଁ ଚେଷ୍ଟା କରି ବିଫଳ ହୋଇଛନ୍ତି । ତେଣୁ ପ୍ରଶାସନ ତୁରନ୍ତ ବୁଡି ଯାଇଥିବା ଡଙ୍ଗାକୁ ଉଦ୍ଧାର କରିବା ପାଇଁ ମତ୍ସ୍ୟଜୀବୀମାନେ ନିବେଦନ କରିଛନ୍ତି ।
