ଭୁବନେଶ୍ୱର(କେନ୍ୟୁଜ୍): କେନ୍ଦ୍ରାପଡ଼ା, ଜଗତସିଂହ ଓ ପୁରୀ ଜିଲ୍ଲାରେ ବନ୍ୟା। ଗତକାଲି ରାତି ଗୋଟାଏ ପରଠାରୁ ପ୍ରବେଶ କରୁଛି ସର୍ବାଧିକ ବନ୍ୟାପାଣି। ମହାନଦୀର ବନ୍ୟା ପାଣି ପହଞ୍ଚିବା ପରେ ଏବେ ମୁଣ୍ଡଳୀରେ ସର୍ବାଧିକ ବନ୍ୟା ପାଣି ପ୍ରବାହିତ ହେଉଛି । ରାତି ୩ଟା ଯାଏଁ ମୁଣ୍ଡଳିରେ ରହିଥିଲା ପିକ୍ ଫ୍ଲୋ । ରାତି ଗୋଟାଏରୁ କେନ୍ଦ୍ରାପଡ଼ା, ଜଗତସିଂହପୁର ଓ ପୁରୀ ଜିଲ୍ଲାରେ ମହାନଦୀର ଜଳସ୍ତର ପିକ୍ରେ ପହଞ୍ଚିବା ଆରମ୍ଭ ହୋଇଛି । ଆଜି ସନ୍ଧ୍ୟା ୬ଟାରୁ ୯ଟା ମଧ୍ୟରେ ପିକ୍ ଫ୍ଲଡ୍ ସମୁଦ୍ରକୁ ଚାଲିଯିବ ବୋଲି କହିଛନ୍ତି ସ୍ୱତନ୍ତ୍ର ରିଲିଫ କମିସନର ପ୍ରଦୀପ ଜେନା।
ମହାନଦୀ ସିଷ୍ଟମର ୨ଟି ସ୍ଥାନରେ ଘାଇ ହୋଇଛି । ପୁରୀ କଣାସ ମକରା ନଦୀ, ଖୋର୍ଦ୍ଧା ରାଜୁଆର ଡାହାଣ ପାଖରେ ଘାଇ ସୃଷ୍ଟି ହୋଇଛି। ବର୍ତ୍ତମାନ ସୁଦ୍ଧା ମହାନଦୀ ଅବବାହିକାର ୧୦ ଜିଲ୍ଲାର ୪୯ ବ୍ଲକର ୧୩୬୬ ଗାଁର ପ୍ରାୟ ୨ ଲକ୍ଷ ବନ୍ୟା ଦ୍ୱାରା ପ୍ରଭାବିତ ହୋଇଛନ୍ତି। ଜଳବନ୍ଦୀ ହୋଇ ରହିଛି ୨୩୭ଟି ଗାଁ। ୨୬ରୁ ୨୭ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ୯୦ଟି ସ୍ଥାନରେ ଲୋକଙ୍କ ପାଇଁ ରନ୍ଧାଖାଦ୍ୟ ବ୍ୟବସ୍ଥା ହୋଇଛି।