ହାତ ଛାଡ଼ି ଶଙ୍ଖ ଫୁଙ୍କିଲେ ବିଧାୟକ ସୁରେନ୍ଦ୍ର ସିଂ ଭୋଇ
ଶଙ୍ଖ ଫୁଙ୍କିଲେ ସୁରେନ୍ଦ୍ର। ଶଙ୍ଖ ଭବନରେ ପହଞ୍ଚି ବିଧିବଦ୍ଧ ଭାବେ ବିଜେଡିରେ ସାମିଲ ହୋଇଛନ୍ତି । ନିଜର ବହୁ ସଂଖ୍ୟାରେ ସମର୍ଥକଙ୍କ ସହ ଶଙ୍ଖ ଭବନରେ ପହଞ୍ଚି ଦଳରେ ସାମିଲ ହୋଇଛନ୍ତି ୩ ଥରର ବିଧାୟକ ସୁରେନ୍ଦ୍ର ସିଂ ଭୋଇ ।
ବଲାଙ୍ଗିର (କେନ୍ୟୁଜ): ଶଙ୍ଖ ଫୁଙ୍କିଲେ ସୁରେନ୍ଦ୍ର। ଶଙ୍ଖ ଭବନରେ ପହଞ୍ଚି ବିଧିବଦ୍ଧ ଭାବେ ବିଜେଡିରେ ସାମିଲ ହୋଇଛନ୍ତି । ନିଜର ବହୁ ସଂଖ୍ୟାରେ ସମର୍ଥକଙ୍କ ସହ ଶଙ୍ଖ ଭବନରେ ପହଞ୍ଚି ଦଳରେ ସାମିଲ ହୋଇଛନ୍ତି ୩ ଥରର ବିଧାୟକ ସୁରେନ୍ଦ୍ର ସିଂ ଭୋଇ । ତାଙ୍କୁ ବଲାଙ୍ଗିର ଲୋକସଭା ଆସନରୁ ବିଜେଡି ପ୍ରାର୍ଥୀ କରିପାରେ ବୋଲି ଚର୍ଚ୍ଚା ହେଉଛି । ସୁରେନ୍ଦ୍ର ସିଂ ଭୋଇ ଜଣେ ତୃଣମୂଳ ସ୍ତରର ଟାଣୁଆ କଂଗ୍ରେସ ନେତା ।
ଗତକାଲି ସେ କଂଗ୍ରେସ ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିଲେ । ସେ ବଲାଙ୍ଗୀର ଜିଲ୍ଲା ସଇଁତଳାରୁ ଦୁଇ ଥର ଓ ଟିଟିଲାଗଡ଼ରୁ ଥରେ ବିଧାୟକ ହୋଇଥିଲେ । ୧୯୯୫ରୁ ୨୦୦୦ ଓ ୨୦୦୦ରୁ ୨୦୦୪ ଯାଏ ସେ ସଇଁତଳାରୁ କଂଗ୍ରେସ ଟିକେଟରେ ବିଧାୟକ ହୋଇଥିଲେ । ସେହିପରି ୨୦୦୯ରୁ ୨୦୧୪ ଯାଏ ଟିଟିଲାଗଡ଼ରୁ ବିଧାୟକ ହୋଇଥିଲେ । କଂଗ୍ରେସ ସରକାରରେ କିଛି ମାସ ପାଇଁ ଜଙ୍ଗଲ, ପରିବେଶ ଓ ଗ୍ରାମ୍ୟ ଉନ୍ନୟନ ବିଭାଗର ମନ୍ତ୍ରୀ ଥିଲେ । ସୁରେନ୍ଦ୍ର ସିଂ ଭୋଇଙ୍କ ବାପା ସ୍ବର୍ଗତ ରମେଶ ଚନ୍ଦ୍ର ସିଂ ଭୋଇ ୬ଥର ବିଧାୟକ ହୋଇଥିଲେ । ଟିଟିଲାଗଡ଼, ବଲାଙ୍ଗୀର,ପାଟଣାଗଡ଼ ଆସନରୁ ଥରେ ଲେଖାଏଁ ଓ ସଇଁତଳାରୁ ୩ ଥର ବିଧାୟକ ଭାବେ ଜିତି ଥିଲେ । ଗତ ଦୁଇଟି ନିର୍ବାଚନରେ ସୁରେନ୍ଦ୍ର ସିଂ ଭୋଇ ପରାସ୍ତ ହୋଇଥିଲେ ।
୨୦୧୪ ଏବଂ ୨୦୧୯ ସାଧାରଣ ନିର୍ବାଚନରେ ସୁରେନ୍ଦ୍ର ସିଂହ ଭୋଇ ଦୁଇଥର ବିଧାୟକ ପ୍ରାର୍ଥୀ ହୋଇ ବିଜେଡିର ଟୁକୁନି ସାହୁଙ୍କ ଠାରୁ ହାରି ଯାଇଥିଲେ । ୨୦୧୪ରେ ସେ ୧୪ ହଜାର ୨୨ଟି ଭୋଟରେ ହାରିଥିବା ବେଳେ ୨୦୧୯ରେ ୧୯ ହଜାର ୫୮୭ ଭୋଟରେ ପରାସ୍ତ ହୋଇଥିଲେ । ତୃଣମୂଳ ସ୍ତରର ଜଣେ ଟାଣୁଆ ନେତା ସୁରେନ୍ଦ୍ର ସିଂ ଭୋଇ । ସେ ଜଣେ ଦୃଢ଼ ସଂଗଠକ । ସଇଁତଳା ବ୍ଲକରେ ତାଙ୍କର ବେଶ ଦବ ଦବା ରହି ଆସିଛି । ଏବେ ତାଙ୍କ ସ୍ତ୍ରୀ ସଇଁତଲା ବ୍ଲକ ଅଧ୍ୟକ୍ଷା ରହିଛନ୍ତି । ସୁରେନ୍ଦ୍ର ଭୋଇ କଂଗ୍ରେସ ଛାଡ଼ିବା ପରେ ଜିଲ୍ଲା ରାଜନୀତି ସରଗରମ ହୋଇଛି ।
