ଏକଦା ବିଜୁ ବାବୁ ପ୍ରଧାନମନ୍ତ୍ରୀ ହେବା କଥା ଚର୍ଚ୍ଚା ହୋଇଥିଲା । ଏବେ ପ୍ରଧାନମନ୍ତ୍ରୀ ପଦ ପାଇଁ ନବୀନଙ୍କ ନାଁକୁ ନେଇ ଚର୍ଚ୍ଚା ହେଉଛି । ଏନେଇ ବିଜେଡି ଉପସଭାପତି ସୂର୍ଯ୍ୟ ନାରାୟଣ ପାତ୍ର କହିଛନ୍ତି, ନବୀନ ହିଁ ପ୍ରଧାନମନ୍ତ୍ରୀ ହେବାକୁ ଯୋଗ୍ୟ । ଓଡ଼ିଶାବାସୀ ଓ ଭାରତବାସୀ ଚାହାନ୍ତି ନବୀନ ପଟ୍ଟନାୟକ ପ୍ରଧାନମନ୍ତ୍ରୀ ହୁଅନ୍ତୁ । କିନ୍ତୁ ସେ କଂଗ୍ରେସ ସମର୍ଥନରେ ପ୍ରଧାନମନ୍ତ୍ରୀ ହେବା ଉଚିତ ନୁହଁ । କାରଣ କଂଗ୍ରେସର ଗୋଡଟାଣିବା ନୀତି ରହିଛି ବୋଲି ସୂର୍ଯ୍ୟ ପାତ୍ର କହିଛନ୍ତି ।
ପୂର୍ବରୁ ନିର୍ବାଚନ ପ୍ରଚାର ବେଳେ ନବୀନ ବିଭିନ୍ନ ସଭାରେ କହିଥିଲେ ଏଥର କେନ୍ଦ୍ରରେ ସରକାର ଗଠନରେ ବିଜେଡି ଗୁରୁତ୍ୱପୂର୍ଣ୍ଣ ଭୂମିକା ତୁଲାଇବ । କିନ୍ତୁ ନବୀନ ଓଡ଼ିଶା ଛାଡି ଦିଲ୍ଲୀ ଯିବାକୁ ଜମା ଆଗ୍ରହୀ ନଥିବା ବହୁବାର ସ୍ପଷ୍ଟୀକରଣ ରଖିସାରିଛନ୍ତି ।
ଏଭିତରେ ଆସନ୍ତା ୨୩ ତାରିଖ ଅର୍ଥାତ ଭୋଟ ଗଣତି ଦିନ ୟୁପିଏ ସହଯୋଗୀ ଦଳଙ୍କ ବୈଠକକୁ ନବୀନଙ୍କୁ ଆମନ୍ତ୍ରଣ କରିଛନ୍ତି ସୋନିଆ ଗାନ୍ଧି । ବିଜେଡି ବୈଠକକୁ ଯିବ କି ନାହିଁ ତାହା ସ୍ପଷ୍ଟ କରି ନାହିଁ। ସେହିପରି ଗତକାଲି ଗୁଲମନବୀ ଆଜାଦ କହିଥିଲେ କଂଗ୍ରେସ କୁ ପ୍ରଧାନମନ୍ତ୍ରୀ ପଦ ନମିଳିଲେ କିଛି ଅସୁବିଧା ନାହିଁ । ଅଣକଂଗ୍ରେସ ଦଳଗୁଡିକ ମଧ୍ୟରେ ଯେଉଁ ସହମତି ହେବ ତାକୁ କଂଗ୍ରେସ ସମର୍ଥନ କରିବ ।