କ’ଣ ପୁଣିଥରେ କଅଁଳିବ ମାନବ ଶରୀରର କଟା ଅଙ୍ଗ? ବେଙ୍ଗ ଉପରେ ଗବେଷଣା ହେଲା ସଫଳ! ୧୮ ମାସ ପରେ ଗତି କରିଲା ନୂତନ ଗୋଡ଼…
ଶରୀରରେ ନଷ୍ଟ ଅଙ୍ଗପ୍ରତ୍ୟଙ୍ଗଗୁଡ଼ିକର ପୁନଃନିର୍ମାଣକୁ ନେଇ ବୈଜ୍ଞାନିକମାନେ ଏକ ନୂତନ ଗବେଷଣା ପାଇଁ ପ୍ରଚେଷ୍ଟା ଚଳାଇଛନ୍ତି। ଝିଟିପିଟି ଓ ତାରକାମାଛ ପରି କିଛି ଜୀବ, ଯେଉଁମାନଙ୍କଠାରେ ଅଙ୍ଗ ପୁନଃନିର୍ମାଣ ହେବାର ପ୍ରାକୃତିକ କ୍ଷମତା ଥାଏ, ସେମାନଙ୍କଠାରୁ ବୈଜ୍ଞାନିକମାନେ ପ୍ରେରଣା ନେଇଛନ୍ତି। ଏହାକୁ କିପରି ଲ୍ୟାବରେ ଲାଗୁ କରାଯାଇ ପାରିବ, ତାହା ଉପରେ ଏବେ ସେମାନେ କାମ କରୁଛନ୍ତି। ଯଦି ଏମିତି ହୁଏ, ତା’ ହେଲେ ଲକ୍ଷ ଲକ୍ଷ ଲୋକଙ୍କୁ ଏହା ସାହାଯ୍ୟ କରି ପାରିବ, ଯେଉଁମାନେ ନିଜର ଅଙ୍ଗ ହରାଇଛନ୍ତି।
ମଣିଷର ଅଙ୍ଗଗୁଡ଼ିକୁ ପୁଣିଥରେ କଅଁଳେଇବାକୁ ପ୍ରୟାସ
ରିପୋର୍ଟ ମୁତାବକ, ଯଦିଓ ପ୍ରୋସ୍ଥେଟିକ୍ସ ଭଳି ଟେକ୍ନୋଲୋଜିରେ ଅଗ୍ରଗତି ହୋଇଛି, କିନ୍ତୁ ଡାକ୍ତରମାନେ ମାନବ ଅଙ୍ଗକୁ ପୁଣିଥରେ କଅଁଳେବାର ବିଭିନ୍ନ ଉପାୟ ଅନୁସନ୍ଧାନ କରୁଛନ୍ତି। ସାଇନ୍ସ ଆଡଭାନ୍ସେସ୍ ଜର୍ନାଲରେ ବୁଧବାର ପ୍ରକାଶିତ ଏକ ନୂଆ ଅଧ୍ୟୟନରେ ବୈଜ୍ଞାନିକ ଟିମ୍ କହିଛି କି, ବୟସ୍କ ବେଙ୍ଗମାନଙ୍କ ଗୋଡ଼ଗୁଡ଼ିକୁ ପୁଣିଥରେ ସୃଷ୍ଟି କରି ହେବ।
ବେଙ୍ଗର କଟା ଗୋଡ଼ଗୁଡ଼ିକୁ ପୁଣିଥରେ ସୃଷ୍ଟି କରାଗଲା
ଆମେରିକାର ବୈଜ୍ଞାନିକ ମାଇକେଲ ଲେଭିନ୍ ଏବଂ ତାଙ୍କ ସହଯୋଗୀମାନେ କହିଛନ୍ତି କି, ସେମାନେ ଏକ ପ୍ରକାରର ପଞ୍ଝା ଲଗା ଆଫ୍ରିକୀୟ ବେଙ୍ଗ (ଜେନୋପସ୍ ଲାଭିସ୍)ଠାରେ ଏକ କଟା ଗୋଡ଼ ପୁଣିଥରେ ବଢ଼ିଥିବାର ଦେଖିଛନ୍ତି। ସେମାନେ ଏହି ପ୍ରକ୍ରିୟାକୁ ‘ରିଜେନେରେଟିଭ୍ ଔଷଧ ଲକ୍ଷ୍ୟର ନିକଟତମ ପଦକ୍ଷେପ’ ବୋଲି କହିଛନ୍ତି।
୧୮ ମାସ ପରେ ପୁନର୍ବାର ଗତି କରିବାକୁ ଲାଗିଲା ଅଙ୍ଗ
ଏହି ଅଧ୍ୟୟନରୁ ଜାଣିବାକୁ ମିଳିଛି କି, କେମିତି ଏକ ଜେନୋପସ୍ ବେଙ୍ଗର ଗୋଡକୁ ବିକଶିତ କରାଯାଇଛି। ପ୍ରକ୍ରିୟା ସମୟରେ ବୈଜ୍ଞାନିକମାନେ ସ୍ଥାନୀୟ ସୂକ୍ଷ୍ମ ପରିବେଶ ଉପରେ ନିୟନ୍ତ୍ରଣ ହାସଲ କରିବା ପାଇଁ ୫ଟି ଔଷଧର କକଟେଲ ଏବଂ ‘ବାୟୋଡୋମ୍’ ନାମକ ଏକ ସିଲିକନ୍ ପରିଧାନ ଯୋଗ୍ୟ ବାୟୋରିଏକ୍ଟରର ମିଶ୍ରଣ ଉପଯୋଗ କରିଥିଲେ। ବୈଜ୍ଞାନିକମାନେ ଖୁଲାସା କରିଛନ୍ତି କି, କକଟେଲ କେବଳ ୨୪ ଘଣ୍ଟା ପାଇଁ ଲଗାଯାଇଥିଲା। ୧୮ ମାସ ପରେ ଏବେ ଏହି ଅଙ୍ଗ ପ୍ରାୟ ସଂପୂର୍ଣ୍ଣ ଭାବରେ ଗତି କରିବା ଆରମ୍ଭ କରିଛି।
ବହୁତ ପ୍ରଭାବଶାଳୀ ଏହି ଗବେଷଣା: ଉତ୍ତର-ପୂର୍ବାଞ୍ଚଳ ବିଶ୍ୱବିଦ୍ୟାଳୟର ଜୀବବିଜ୍ଞାନ ବିଭାଗର ସହଯୋଗୀ ପ୍ରଫେସର ଜେମ୍ସ ମୋନାଘନ୍ ଏହି ପରିଣାମକୁ ପ୍ରଭାବଶାଳୀ ଏବଂ ରୋମାଞ୍ଚକର ବୋଲି କହିଛନ୍ତି। ହେଲେ ସେ ଏହି ଗବେଷଣାରେ ସାମିଲ ହୋଇ ନ ଥିଲେ।
