ଲୋକପ୍ରିୟ କନ୍ନଡ ଅଭିନେତା ଦର୍ଶନ ଗିରଫ, ହତ୍ୟା ଅଭିଯୋଗରେ ବାନ୍ଧିଲା ପୋଲିସ

କନ୍ନଡ ଅଭିନେତା ଦର୍ଶନଙ୍କୁ ଗିରଫ କଲା ପୋଲିସ । ରେଣୁକାସ୍ୱାମୀ ନାମକ ଜଣେ ଯୁବକଙ୍କୁ ହତ୍ୟା ଅଭିଯୋଗରେ ଗିରଫ ହୋଇଛନ୍ତି ଅଭିନେତା । ମହୀଶୁର ପୋଲିସ ତାଙ୍କୁ ଗିରଫ କରି ବେଙ୍ଗାଲୁରୁ ନେଇଛି । ସେଠାରେ ତାଙ୍କୁ ପଚରାଉଚରା ଚାଲିଛି। ପୋଲିସ ହତ୍ୟା ମାମଲାରେ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି ।

ରେଣୁକାସ୍ୱାମୀ ନାମକ ଯୁବକଙ୍କ ହତ୍ୟା ମାମଲାରେ ଜଣେ ଅଭିଯୁକ୍ତ ଦର୍ଶନଙ୍କ ନାଁ ନେଇଥିଲେ । ଅଭିଯୁକ୍ତଙ୍କ ସହ ଦର୍ଶନ ବାରମ୍ବାର ଯୋଗାଯୋଗରେ ଥିବା ଅଭିଯୋଗ ହୋଇଛି । ହତ୍ୟା କରାଯାଇଥିବା ଯୁବକଙ୍କ ମା’ଙ୍କ ଅଭିଯୋଗ ଆଧାରରେ ପୋଲିସ ଗିରଫ କରିଛି । ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି ।

ପୋଲିସ ଅନୁସାରେ, ଦର୍ଶନ ଏବଂ ମାମଲା ସହ ଜଡ଼ିତ ୯ ଜଣ ଲୋକଙ୍କୁ ଚିତ୍ରଦୁର୍ଗର ରେଣୁକାସ୍ୱାମୀ ନାମକ ଜଣେ ବ୍ୟକ୍ତିଙ୍କ ହତ୍ୟା ଘଟଣାରେ ଗିରଫ କରାଯାଇଛି । ରିପୋର୍ଟ ଅନୁଯାୟୀ, ରେଣୁକାସ୍ୱାମୀ ପ୍ରଥମେ ଚିତ୍ରାଦୁରଗାରୁ ଅପହରଣ ହୋଇଥିଲେ ଏବଂ ଏହା ପରେ ତାଙ୍କ ମୃତଦେହ ସହରର ପଶ୍ଚିମ ଭାଗର କାମାକ୍ସିପାଲିଆରେ ମିଳିଥିଲା ।

ତେବେ ଏ ନେଇ ତଦନ୍ତ ଜାରି ରହିଥିବା ବେଳେ ସୁପରଷ୍ଟାର ଦର୍ଶନଙ୍କ ନାଁ ନେଇଥିଲା ଗିରଫ ଅଭିଯୁକ୍ତ । ଏହାପରେ ପୋଲିସ ଦର୍ଶନଙ୍କୁ ଗିରଫ କରିବା ସହ ହେପାଜତକୁ ନେଇ ତାଙ୍କୁ ପଚରାଉଚରା ଜାରି ରଖିଛି ।

ଦର୍ଶନ ଅଭିନୟ କ୍ୟାରିୟର ଆରମ୍ଭ କରିବା ପୂର୍ବରୁ, ଜଣେ ପ୍ରୋଜେକ୍ଟନିଷ୍ଟ ଭାବେ କାମ କରୁଥିଲେ । ପରେ ସେ ପ୍ରସିଦ୍ଧ ସିନେମାଟୋଗ୍ରାଫର ବିସି ଗୌରୀଶଙ୍କରଙ୍କ ଆସିଷ୍ଟାଣ୍ଟ କ୍ୟାମେରାମ୍ୟାନ୍ ହୋଇଥିଲେ । ତାଙ୍କର ପ୍ରଥମ ଫିଲ୍ମ ମହାଭାରତ ୧୯୯୭ରେ ରିଲିଜ ହୋଇଥିଲା । ଏହାପରେ ତାଙ୍କୁ ଅନେକ ଫିଲ୍ମରେ ଅଭିନୟ କରିବାର ସୁଯୋଗ ମିଳିଥିଲା । ‘ନାମ୍ମା ପ୍ରୀତିୟା ରାମୁ’, ‘କଲାସିପାଲ୍ୟା’, ‘ଗାଜା’, ‘କରିଆ’, ‘ନବଗ୍ରହ’, ‘ସାରଥୀ’, ‘ବୁଲବୁଲ’ ଭଳି ଅନେକ ହିଟ୍ ଫିଲ୍ମରେ ଅଭିନୟ କରିଛନ୍ତି ।