ମହାରାଷ୍ଟ୍ରରେ ଭୟଙ୍କର ସଡ଼କ ଦୁର୍ଘଟଣା, ଟାଟା ମ୍ୟାଜିକ୍କୁ ଧକ୍କା ଦେଲା ଦ୍ରୁତଗାମୀ ଟ୍ରକ୍; ୮ ଯାତ୍ରୀ ମୃତ
ମହାରାଷ୍ଟ୍ରର ରତ୍ନଗିରି ଜିଲ୍ଲାରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଦାପୋଲି-ହରନେ ରାଜ୍ୟ ରାଜପଥର ଅସୁଦଠାରେ ଏକ ଦ୍ରୁତଗାମୀ ଟ୍ରକ୍ ଟାଟା ମ୍ୟାଜିକ୍କୁ ଧକ୍କା ଦେବା ଫଳରେ ୮ ଯାତ୍ରୀଙ୍କ ମୃତ୍ୟୁ ଘଟିଛି।
ମହାରାଷ୍ଟ୍ରର ରତ୍ନଗିରି ଜିଲ୍ଲାରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଦାପୋଲି-ହରନେ ରାଜ୍ୟ ରାଜପଥର ଅସୁଦଠାରେ ଏକ ଦ୍ରୁତଗାମୀ ଟ୍ରକ୍, ଟାଟା ମ୍ୟାଜିକ୍କୁ ଧକ୍କା ଦେଇଛି। ଏହି ଦୁର୍ଘଟଣାରେ ଟାଟା ମ୍ୟାଜିକ୍ରେ ଥିବା ୮ ଜଣ ଯାତ୍ରୀଙ୍କର ମୃତ୍ୟୁ ଘଟିଥିବା ବେଳେ ୧୪ ଜଣ ଆହତ ହୋଇଛନ୍ତି।
ପୋଲିସ ସୂଚନା ମୁତାବକ, ରବିବାର ଦ୍ୱିପ୍ରହରରେ ଜିନିଷ ଓହ୍ଲାଇ ଦାପୋଲି ଆଡ଼କୁ ଏକ ଟ୍ରକ୍ ଦ୍ରୁତ ଗତିରେ ଯାଉଥିଲା। ଏହି ସମୟରେ ଟ୍ରକ୍ଟି ହରନେ ଗାଁ ନିକଟରେ ଏକ ଯାତ୍ରୀବାହୀ ଟାଟା ମ୍ୟାଜିକ୍କୁ ଜୋର୍ରେ ଧକ୍କା ଦେଇଥିଲା। ଫଳରେ ୫ ଜଣଙ୍କର ଘଟଣାସ୍ଥଳରେ ହିଁ ପ୍ରାଣବାୟୁ ଉଡ଼ିଯାଇଥିଲା।
ବିଳମ୍ବିତ ରାତିରେ ଚିକିତ୍ସା ସମୟରେ ଆଉ ୩ ଜଣଙ୍କର ମୃତ୍ୟୁ ଘଟିଥିଲା। ସମସ୍ତ ଆହତଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ଦୁର୍ଘଟଣାର କାରଣ ଏ ପର୍ଯ୍ୟନ୍ତ ଜଣାପଡ଼ି ନାହିଁ।
ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଏହି ଦୁର୍ଘଟଣାରେ ଗଭୀର ଶୋକ ପ୍ରକାଶ କରିଛନ୍ତି। ପ୍ରତି ମୃତକଙ୍କ ପରିବାରକୁ ମୁଖ୍ୟମନ୍ତ୍ରୀ ରିଲିଫ୍ କୋଷରୁ ୫ ଲକ୍ଷ ଟଙ୍କା ଲେଖାଏ ଅନୁକମ୍ପାମୂଳକ ରାଶି ଘୋଷଣା କରାଯାଇଛି। ସିଏମ୍ ସିନ୍ଦେ ଆହତମାନଙ୍କୁ ସରକାରୀ ଖର୍ଚ୍ଚରେ ଉଚିତ୍ ଚିକିତ୍ସା ସେବା ପ୍ରଦାନ କରିବାକୁ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି। ସେପଟେ ଓଡ଼ିଶାର ଗଞ୍ଜାମ ଜିଲ୍ଲା ଦିଗପହଣ୍ଡିରେ ମଧ୍ୟ ମର୍ମନ୍ତୁଦ ସଡ଼କ ଦୁର୍ଘଟଣାରେ ୧୨ ଜଣଙ୍କର ମୃତ୍ୟୁ ଘଟିଛି।
Eight people were killed and some passengers were injured in a truck and rickshaw accident at Asud on the Dapoli-Harne road in Ratnagiri district. Maharashtra CM Eknath Shinde expressed his condolences & announces to give Rs 5 lakh each to the families of the deceased from the…
— ANI (@ANI) June 26, 2023
