ରେଷ୍ଟୁରାଣ୍ଟର ମାଗଣା WiFi ରୁ ହୋମ ୱାର୍କ ପୂରା କରୁଥିଲେ ଦୁଇ ଛାତ୍ରୀ, ଫଟୋ ଭାଇରଲ ହେବା ପରେ ଜମା ହୋଇଗଲା ୧.୪୦ ଲକ୍ଷ ଡଲାର
ଅନଲାଇନ ଫଣ୍ଡ ଜମା କରୁଥିବା ଏକ ସଂସ୍ଥା ଆମେରିକାର ଦୁଇ ସ୍କୁଲ ଛାତ୍ରୀଙ୍କ ପାଇଁ ୧,୪୦,୦୦୦ ଡଲାରରୁ ଅଧିକ ଟଙ୍କା ଯୋଗାଡ଼ କରିବାରେ ସଫଳ ହୋଇଛି। ଛାତ୍ରୀ ଦୁଇଜଣ ନିଜ ହୋମ ୱାର୍କ ପୂରା କରିବା ପାଇଁ ଫାଷ୍ଟ ଫୁଡ ରେଷ୍ଟୁରାଣ୍ଟର ମାଗଣା ୱାଇଫାଇ ବ୍ୟବହାର କରୁଥିଲେ। ଏହି ଫଟୋ ସୋସିଆଲ ମିଡିଆରେ ଭାଇରଲ ହୋଇଯାଇଥିଲା।
ବ୍ରିଟିଶ ଇଣ୍ଟରନେଟ ମିଡିଆ କମ୍ପାନୀ ୟୁନିଲେଣ୍ଡ ଅନୁସାରେ, ଛାତ୍ରୀ ଦୁଇଜଣଙ୍କ ଫଟୋ ଜଣେ ଇନଷ୍ଟାଗ୍ରାମ ୟୁଜରଙ୍କ ଦ୍ଵାରା ସେୟାର ହେବା ପରେ ତାହା ଭାଇରଲ ହୋଇଯାଇଥିଲା। ଏହି ଫଟୋରେ ଛାତ୍ରୀମାନେ କାର୍ଲିଫର୍ନିଆରେ ଟେକୋ ବେଲ ଆଉଟଲେଟର ପାର୍କିଂରେ ବସିଥିବା ନଜର ଆସୁଛନ୍ତି। ତେବେ ଜଣେ ୟୁଜର ଏହି ଫଟୋ ଉପରେ କମେଣ୍ଟ କରି ଲେଖିଛନ୍ତି, ଆଜିକାଲି ଯୁଗରେ ଏହା ଡିଜିଟାଲ ବିଭାଜନକୁ ଦର୍ଶାଉଛି, ଯେଉଁଠି କିଛି ଲୋକ ଇଣ୍ଟରନେଟ କନେକ୍ସନ ଆଣିପାରୁନାହାନ୍ତି।
ତେବେ ଯିଏ ଏହି ଫଟୋକୁ ସେୟାର କରିଥିଲେ, ସେ ଲେଖିଥିଲେ କି, ‘ଆମ ଭିତରୁ ଅନେକ ଲୋକ ଘରୁ କାମ କରିବା ପାଇଁ ଉଚିତ ୱାଇଫାଇ କିମ୍ବା ଏକ ଶାନ୍ତ ପରିବେଶ ବିଷୟରେ ଚିନ୍ତା କରିବାର କୌଣସି ଆବଶ୍ୟକତା ନାହିଁ। ପ୍ରି ସ୍କୁଲରୁ ନେଇ କଲେଜ ପର୍ଯ୍ୟନ୍ତ ପ୍ରତ୍ୟେକ ଛାତ୍ର ପାଖରେ ୱାଇଫାଇ ପହଞ୍ଚିବା ଦରକାର। ଖାସ କରି ଏବେ ଏବଂ ଆଜିର ସମୟରେ’।
ଗତ ସପ୍ତାହରେ ସେୟାର କରାଯାଇଥିବା ଏହି ଫଟୋକୁ ଏ ପର୍ଯ୍ୟନ୍ତ ୭୦ ହଜାରରୁ ଅଧିକ ଲାଇକ ମିଳିସାରିଲାଣି। ଦ କାର୍ଲିଫର୍ନିଆନ ମୁତାବକ, ଫଟୋ ଭାଇରଲ ହେବା ପରେ ଜିଲ୍ଲା ଅଧିକାରୀ ଛାତ୍ରୀ ଦୁଇଜଣଙ୍କ ଘରେ ଇଣ୍ଟରନେଟ ହଟସ୍ପଟ ଲଗାଇ ଦେଇଛନ୍ତି।
