ମିସ୍ ଓ ମିସ୍ ସମଲିଙ୍ଗୀ ବିବାହ, ଯୋଡ଼ି ହେଲେ ମିସ୍ ଆର୍ଜେଣ୍ଟିନା ଓ ମିସ୍ ପୁଏର୍ଟୋରିକୋ; ଅନେକ ଦିନରୁ ଥିଲା ପ୍ରେମ ସମ୍ପର୍କ
ମିସ୍ ଆର୍ଜେଣ୍ଟିନା ମାରିୟାନା ଭରେଲା ଓ ମିସ୍ ପୁଏର୍ଟୋରିକୋ ଫ୍ୟାବିୟୋଲା ଭ୍ୟାଲେଣ୍ଟିନ୍ ଦୁହେଁ ଦୁହିଁଙ୍କ ସହିତ ବିବାହ ବନ୍ଧନରେ ବାନ୍ଧି ହୋଇଛନ୍ତି। ସେମାନେ ଏ ନେଇ ସୋସିଆଲ ମିଡିଆ ଜରିଆରେ ଘୋଷଣା କରିଛନ୍ତି। ନବବିବାହିତା ଦମ୍ପତି ଦୀର୍ଘ ଦିନ ଧରି ଏହି ସମ୍ପର୍କକୁ ଗୁପ୍ତ ରଖିବା ପରେ ଏବେ ଏହାକୁ ଅଫିସିଆଲ କରି ଦେଇଛନ୍ତି। ନିକଟରେ ଦୁଇଜଣ ନିଜ ନିଜ ଇନ୍ଷ୍ଟାଗ୍ରାମ ହ୍ୟାଣ୍ଡେଲରେ ନିଜର ସମ୍ପର୍କ, ନିର୍ବନ୍ଧ ଏବଂ କିଛି ଭାବପୂର୍ଣ୍ଣ ମୁହୂର୍ତ୍ତର ଝଲକ୍ ଦେଖାଇ ଏକ ଭିଡିଓ ସେୟାର କରିଥିଲେ। ଦୁଇଜଣଙ୍କ ବିବାହ ଅକ୍ଟୋବର ୨୮ରେ ହୋଇଥିଲା।
ଭିଡିଓରେ ମାରିୟାନା ଭରେଲା ଓ ଫ୍ୟାବିୟୋଲା ଭ୍ୟାଲେଣ୍ଟିନ୍ଙ୍କୁ ଏକାଠି ଛୁଟି କାଟୁଥିବାର ଦେଖାଯାଇ ପାରିବ। ଏଥିସହ ସେମାନେ ନିଜ ବିବାହର ଏକ ଝଲକ୍ ମଧ୍ୟ ସେୟାର କରିଥିଲେ। କ୍ଲିପ୍ରେ ସେମାନଙ୍କୁ ଧଳା କପଡ଼ା ପିନ୍ଧିଥିବାର ବି ଦେଖାଯାଉଛି। ପୁଏର୍ଟୋରିକୋର ସ୍ୟାନ୍ ଜୁଆନରେ ସେମାନେ ନିଜ ମିଳନର ଉତ୍ସବ ପାଳନ କରୁଛନ୍ତି।
View this post on Instagram
ଭିଡିଓ ସେୟାର କରି ସେମାନେ ଏହାର କ୍ୟାପସନ ଲେଖିଛନ୍ତି, ‘ନିଜ ସମ୍ପର୍କକୁ ବ୍ୟକ୍ତିଗତ ରଖିବାର ବିକଳ୍ପ ବାଛିବା ପରେ ଆମେ ଏକ ବିଶେଷ ଦିନ ପାଇଁ ନିଜର ଫାଟକ ଖୋଲୁଛୁ। ୨୮-୧୦-୨୨’। କହି ରଖୁଛୁ, ଭରେଲା ଓ ଭ୍ୟାଲେଣ୍ଟିନ୍ ସୌନ୍ଦର୍ଯ୍ୟ ପ୍ରତିଯୋଗିତା ‘ମିସ୍ ଗ୍ରାଣ୍ଡ ଇଣ୍ଟରନ୍ୟାସନାଲ ୨୦୨୦’ରେ ପରସ୍ପରକୁ ଭେଟିଥିଲେ ଏବଂ ପେଜାଣ୍ଟର ଶେଷ ପର୍ଯ୍ୟନ୍ତ ସାଙ୍ଗ ହୋଇ ରହିଥିଲେ। ଭରେଲା ମିସ୍ ୟୁନିଭର୍ସ ୨୦୧୯ରେ ଆର୍ଜେଣ୍ଟିନା ପ୍ରତିନିଧିତ୍ୱ କରିଥିଲେ ଏବଂ ‘ମିସ୍ ଗ୍ରାଣ୍ଡ ଇଣ୍ଟରନ୍ୟାସନାଲ ୨୦୨୦’ରେ ଶ୍ରେଷ୍ଠ ୧୦ ଜଣଙ୍କ ମଧ୍ୟରେ ବି ରହିଥିଲେ। ଏହି ଯୋଡ଼ି ଅନେକ ମଡେଲିଂ ଏଜେନ୍ସି ସହିତ ବି କାମ କରିଛନ୍ତି।