ପାକିସ୍ତାନ ପାଇଁ ଗୁଇନ୍ଦା ଗିରି କରୁଥିବା ଅଭିଯୋଗରେ ନାସିକ ସ୍ଥିତ ସରକାରୀ ସଂସ୍ଥା ହିନ୍ଦୁସ୍ଥାନ ଏରୋନେଟିକ୍ସ ଲିମିଟେଡ଼ର ଦୁଇ ଅଧିକାରୀଙ୍କୁ ଆଣ୍ଟି ଟେରୋରିସମ ସ୍କୁଆର୍ଡ଼ ଟିମ ଗିରଫ କରିଛନ୍ତି । ପାକିସ୍ତାନ ଗୁଇନ୍ଦା ସଂସ୍ଥା ଇଣ୍ଟର ସର୍ଭିସେସ ଇଣ୍ଟେଲିଜେନ୍ସକୁ ତଥ୍ୟ ଦେବା ଅଭିଯୋଗରେ ମହାରାଷ୍ଟ୍ର ଏଟିଏସ ଟିମ ଏହି ଦୁଇ ଅଧିକାରୀଙ୍କୁ ଗିରଫ କରିଥିବା ଜଣାଯାଇଛି । ଏଟିଏସ ତରଫରୁ ଜାରି ହୋଇଥିବା ରିପୋର୍ଟ ଅନୁଯାୟୀ, ଭାରତ ପ୍ରସ୍ତୁତ ଫାଇଟର ଏୟାରକ୍ରାଫଟ ଓ ଏହାର ପ୍ରସ୍ତୁତି ପ୍ରସ୍ତୁତି ବାବଦରେ ଏମାନେ ଗୁପ୍ତ ତଥ୍ୟ ପାକିସ୍ତାନକୁ ଦେଇ ଆସୁଥିଲେ । ଏହା ସହ ଅଭିଯୁକ୍ତ ମାନେ ଏୟାରବେଶ ଓ ନିଶେଦ୍ଧାଞ୍ଚଳ ଗୁଡିକ ବାବଦରେ ତଥ୍ୟ ପାକିସ୍ତାନ ଏୟାରବେଶକୁ ଦେଇ ଆସୁଥିଲେ ।
ପଚରାଉଚୁରାରୁ ଜଣାଯାଇଛିଯେ, ଗିରଫ ଅଧିକାରୀ ଦୁହେଁ ଲଗାତାର ଭାବେ ଆଇଏସଆଇ ସହ ସମ୍ପର୍କ ରଖିଆସୁଥିଲେ । ଏନେଇ ତାଙ୍କ ବିରୋଧରେ ଅନେକ ପ୍ରମାଣ ମଧ୍ୟ ମିଳିଛି । ଏନେଇ ଏଟିଏସ ଟିମ ପକ୍ଷରୁ ଅଫିସିଆଲ ସିକ୍ରେଟ ଆକ୍ଟ ୧୯୨୩ ଅନ୍ତର୍ଗତ ଧାରା ୩,୪ ଓ ୫ ଅଧୀନରେ ଏଫଆଇଆର ରେଜିଷ୍ଟାର ହୋଇଛି । ଏହା ସହ ଅଭିଯକ୍ତ ମାନେ ବ୍ୟବହାର କରୁଥିବା ୩ଟି ମୋବାଇଲ ଫୋନ, ଦୁଇ ମେମୋରୀ କାର୍ଡ ସମେତ ୫ ଟି ସିମ କାର୍ଡକୁ ଜବତ କରାଯାଇ ଫରେନସିକ ଟିମ ନିକଟକୁ ଯାଞ୍ଚ ପାଇଁ ପଠାଇ ଦିଆଯାଇଛି । ଶୁକ୍ରବାର ଏମାନଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ୧୦
ଦିନ ପାଇଁ ପୋଲିସ କଷ୍ଟଡିରେ ରଖାଯିବ ବୋଲି ଜଣାଯାଇଛି ।