ଭୁବନେଶ୍ବର (କେନ୍ୟୁଜ୍) : ଯାହା ଆଶା କରାଯାଉଥିଲା ସେଇଆ ହେଲା । ଭୁବନେଶ୍ବର କିଟ୍ ଷ୍ଟାଡିୟମରେ ଖେଳା ଯାଇଥିବା ଦ୍ବିତୀୟ ରାଉଣ୍ଡ ରଣଜୀ ଟ୍ରଫି ମ୍ୟାଚରେ ଘରୋଇ ଓଡ଼ିଶା ଦଳ ଶୋଚନୀୟ ଭାବେ ପରାସ୍ତ ହୋଇଛି । ଉତ୍ତର ପ୍ରଦେଶ ଏହାକୁ ୧୦ ୱିକେଟରେ ପରାସ୍ତ କରି ଦମଦାର ବିଜୟ ହାସଲ କରିଛି ।
ଗତକାଲି ୩ୟ ଦିବସ ଖେଳ ଶେଷ ସୁଦ୍ଧା ଓଡ଼ିଶା ଦଳ ୭ ୱିକେଟ୍ ହରାଇ ୧୮୦ ରନ୍ କରିଥିଲା । ପ୍ରଥମ ଇନିଂସରେ ୧୮୧ ରନ୍ ପଛରେ ଥିବା ଘରୋଇ ଦଳ ବାକି ୩ଟି ୱିକେଟ୍ ହରାଇ ଆଉ ମାତ୍ର ୪୧ ରନ୍ ଯୋଡ଼ି ପାରିଥିଲା । ଓଡ଼ିଶା ୨୨୧ ରନରେ ଅଲଆଉଟ ହେବା ପରେ ଉତ୍ତର ପ୍ରଦେଶ ଆଗରେ ବିଜୟଲକ୍ଷ୍ୟ ରହିଥିଲା ମାତ୍ର ୪୧ ରନ୍ । କୌଣସି ୱିକେଟ୍ ନହରାଇ ୟୁପି ଓପ୍ନରଙ୍କ ଜରିଆରେ ଆବଶ୍ୟକ ରନ୍ ସଂଗ୍ରହ କରି ନେଇଥିଲା ।
ଦୁଇଟି ମ୍ୟାଚ୍ ଖେଳି ଓଡ଼ିଶା ମାତ୍ର ଗୋଟିଏ ପଏଣ୍ଟ ହାସଲ କରିଛି । ଉତ୍ତର ପ୍ରଦେଶ ତାର ଦୁଇଟି ଯାକ ମ୍ୟାଚ୍ ଜିତି ୧୪ ପଏଣ୍ଟ ସହ ଗ୍ରୁପ ‘ସି’ର ଶୀର୍ଷରେ ରହିଛି ।
ସ୍କୋର : ଓଡ଼ିଶା ପ୍ରଥମ ଇନିଂସ୍–୨୫୬ । ଦ୍ବିତୀୟ ଇନିଂସ୍–୨୨୧, ୭୨.୩ ଓଭର (ସନ୍ଦୀପ ପଟ୍ଟନାୟକ ୪୬, ଗୋବିନ୍ଦ ପୋଦ୍ଦାର ୨୭, ଶୁଭ୍ରାଂଶୁ ସେନାପତି ୪୨, ଶାନ୍ତନୁ ମିଶ୍ର ୩୭ । ଅଙ୍କିତ ରାଜପୁତ ୨୩.୩–୮–୬୪–୪, ଶିବମ ମାଭି ୧୮–୩–୬୮–୫) ।
ଉତ୍ତର ପ୍ରଦେଶ ପ୍ରଥମ ଇନିଂସ୍–୪୩୭ । ଦ୍ବିତୀୟ ଇନିଂସ୍–୪୪/୦, ୧୨.୫ ଓଭର (ମାଧବ କୌଶିକ ଅପରାଜିତ ୨୨, ମହମ୍ମଦ ସୈଫ ଅପରାଜିତ ୧୬) ।