ଟି-୨୦ବିଶ୍ୱକପରେ ଲଗାତାର ଦୁଇ ଦୁଇଟି ମ୍ୟାଚ୍ ପାକିସ୍ତାନ ହାରିବା ପରେ ଦେଶବାସୀ ଏବଂ ଫ୍ୟାନ୍ସଙ୍କ ମନୋବଳ ଭାଙ୍ଗିଯାଇଛି। ବାରମ୍ବାର ଖେଳାଳିଙ୍କୁ ଟ୍ରୋଲ କରୁଛନ୍ତି ଫ୍ୟାନ୍ସ। ତେବେ ପାକିସ୍ତାନ କ୍ରିକେଟ ସହିତ ଜଡିତ ଅନେକ ଏମିତି କଥା ରହିଛି, ଯାହା ଫ୍ୟାନ୍ସଙ୍କୁ ବିଚଳିତ କରୁଛି। ପାକିସ୍ତାନ କ୍ରିକେଟ ସହିତ ଜଡିତ ମ୍ୟାଚ୍ ଫିକ୍ସିଂ, ସ୍ପଷ୍ଟ ଫିକ୍ସିଂ ବିଭିନ୍ନ ପ୍ରକାର ମାମଲା ରହିଛି। ଅନେକ ଥର ଖେଳାଳି ଉପରେ ବିଭିନ୍ନ ଆରୋପ ଲାଗିଛି। ହେଲେ ଏବେ ଓ୍ଵାସିମ ଆକ୍ରମଙ୍କ ବୟାନ ପୁଣିଥରେ ସମସ୍ତଙ୍କ ମନ ଦୁଃଖ କରିଦେଇଛି। ୫୬ ବର୍ଷୀୟ ଓ୍ଵାସିମ ଆକ୍ରମ କହିଛନ୍ତି, ଡ୍ରଗ୍ସ ମୋ ଜୀବନ ନଷ୍ଟ କରିଦେଇଛି। କେବଳ ଏତିକି ନୁହେଁ, କୋକିନ ଯୋଗୁଁ ମୋ ଜୀବନ ବରବାଦ ହୋଇଯାଇଛି। କିନ୍ତୁ ଏକ ଦୁର୍ଘଟଣା ମୋ ଜୀବନକୁ ବଦଳାଇ ରଖିଦେଇଥିଲା।
ପାକିସ୍ତାନର ପୂର୍ବତନ ଅଧିନାୟକ ତଥା ଦ୍ରୁତ ବୋଲର ଓ୍ଵାସିମ ଆକ୍ରମ ଅଟୋବାୟୋଗ୍ରାଫିରେ ଅନେକ ଗୁମର ବିଷୟରେ ଜଣାପଡିଛି। ଏହି ଗୁମର ଖୋଲିବା ପରେ ଓ୍ଵାସିମ ଆକ୍ରମଙ୍କ ଫ୍ୟାନ୍ସ ଏବଂ ସଂପୂର୍ଣ୍ଣ କ୍ରିକେଟ ଜଗତ ଆଶ୍ଚର୍ଯ୍ୟ ହୋଇଛି। ରିପୋର୍ଟ ମୁତାବକ, ଆକ୍ରମଙ୍କ ଅଟୋବାୟୋଗ୍ରାଫି ‘ ସୁଲତାନ ଏ ମେମୋର’ରେ କୋକିନ ଏବଂ ଡ୍ରଗ୍ସରେ କିପରି ସେ ଅଭ୍ୟସ୍ତ ଥିଲେ ତାହା ବଖାଣିଛନ୍ତି। ଡ୍ରଗ୍ସ ନେବା ତାଙ୍କର ଏକ ଖରାପ ଅଭ୍ୟାସରେ ପରିଣତ ହୋଇଥିଲା। କେବଳ ଏତିକି ନୁହେଁ ନିଜ କ୍ରିକେଟ କ୍ୟାରିଅର ଛଡା ନିଜ ଜୀବନ ସହିତ ଜଡିତ ଅନେକ ରହସ୍ୟ ଉପରୁ ପରଦା ଉଠାଇଛନ୍ତି।
ଆକ୍ରମ ନିକ ପୁସ୍ତକରେ ଲେଖିଛନ୍ତି, ପ୍ରଥମ ଥର ପାଇଁ ଇଂଲଣ୍ଡରେ ଏକ ପାର୍ଟିରେ ସେ କୋକିନ ନେଇଥିଲେ। ପ୍ରଥମେ ପ୍ରଥମେ କୋକିନର ଗୋଟେ ଲାଇନ ସେ ନେଉଥିଲେ। ତା’ ପରେ ଦୁଇ, ତିନିରୁ ବଢି କେତେ ବେଳେ ୧ କିମ୍ବା ୨ ଗ୍ରାମ କୋକିନ ନେଉଥିଲେ, ତାହା ଜାଣିପାରିନଥିଲେ। ଏହି ନିଶା ତାଙ୍କ ଉପରେ କବଜା କରିନେଇଥିଲା। କ୍ୟାରିଅର ସହିତ ବ୍ୟକ୍ତିଗତ ଜୀବନ ମଧ୍ୟ ପ୍ରଭାବିତ ହେଲା। ଆଉ ଏମିତି ସମୟ ଆସିଲା, ଯେତେବେଳେ ସେ ଡ୍ରଗ୍ସ ବିନା ବଞ୍ଚିବା ଅସମ୍ଭବ ହୋଇପଡିଥିଲା।
ପାର୍ଟିକୁ ଯିବାକୁ ବହୁତ ପସନ୍ଦ କରୁଥିଲ ଆକ୍ରମ। ତେଣୁ ଗୋଟେ ରାତିରେ ୧୦-୧୦ଟି ପାର୍ଟିକୁ ଯାଉଥିଲେ। ଏହି କାରଣ ଯୋଗୁଁ ତାଙ୍କ ଖେଳ ଉପରେ ବେଶ୍ ପ୍ରଭାବ ପଡିଥିଲା। ତେବେ ପ୍ରଥମ ପତ୍ନୀ ହୁମାଙ୍କ ମୃତ୍ୟୁ ତାଙ୍କ ଜୀବନରେ ସବୁକିଛି ପରିବର୍ତ୍ତନ କରିଥିଲା। ୨୦୦୯ରେ ଏକ ଦୁର୍ଲଭ ଫଙ୍ଗଲ ଇମ୍ଫେକ୍ସନରେ ହୁମାଙ୍କ ମୃତ୍ୟୁ ହୋଇଥିଲା। ହୁମା ଶେଷ ସମୟ ଯାଏ ଆକ୍ରମଙ୍କ ନିଶା ଛଡାଇବାକୁ ଚାହିଁଥିଲେ। ଏହା ପରେ ସେ କୋକିନ ଖାଇବେନି ବୋଲି ନିଷ୍ପତ୍ତି ନେଇଥିଲେ।
୧୯୮୪ରେ ଅର୍ନ୍ତରାଷ୍ଟ୍ରୀୟ କ୍ରିକେଟରେ ପଦାର୍ପଣ କରିଥିଲେ ଓ୍ଵାସିମ ଆକ୍ରମ । ପାକିସ୍ତାନ ପାଇଁ ୧୦୪ଟି ଟେଷ୍ଟ ଏବଂ ୩୫୬ ଅର୍ନ୍ତରାଷ୍ଟ୍ରୀୟ ମ୍ୟାଚ୍ ଖେଳିଛନ୍ତି। ସେ ୧୯୯୨ରେ ଟିମ୍ ସହିତ ବିଶ୍ୱକପ୍ ମଧ୍ୟ ଜିତିଛନ୍ତି। ତେବେ ଆକ୍ରମ କ୍ରିକେଟରୁ ସନ୍ନ୍ୟାସ ନେବା ପରେ କମେଣ୍ଟ୍ରି କରୁଥିବାର ନଜର ଆସୁଛନ୍ତି। ଓ୍ଵାସିମ ଆକ୍ରମ କ୍ରିକେଟରେ ମୋଟ ୯୧୬ଟି ଓ୍ଵିକେଟ ନେଇଥିବା ବେଳେ ଫାଷ୍ଟ କ୍ଲାସ କ୍ରିକେଟରେ ୧୦୪୨ ଓ୍ଵିକେଟ ନେଇଛନ୍ତି।