କରୋନା ମୁକାବିଲା କରିବାକୁ ଭୁବନେଶ୍ୱରରେ କମିଶନରେଟ୍ ପୋଲିସ ପକ୍ଷରୁ ବ୍ୟବସାୟୀଙ୍କ ପାଇଁ ଗାଇଡ୍ଲାଇନ୍ ଜାରି
ଭୁବନେଶ୍ୱର: କରୋନା ମୁକାବିଲା କରିବାକୁ ଭୁବନେଶ୍ୱରରେ କମିଶନରେଟ୍ ପୋଲିସ ପକ୍ଷରୁ ବ୍ୟବସାୟୀଙ୍କ ପାଇଁ ଗାଇଡ୍ଲାଇନ୍ ଜାରି କରାଯାଇଛି । ଏକ ନିର୍ଦ୍ଦିଷ୍ଟ ସମୟରେ ଦୋକାନ ଭିତରକୁ କମ୍ ସଂଖ୍ୟକ ଗ୍ରାହକଙ୍କୁ ଛାଡିବା ପାଇଁ କୁହାଯାଇଛି । ଦୋକାନରେ ଗ୍ରାହକ ଓ କର୍ମଚାରୀଙ୍କ ମଧ୍ୟରେ ୬ ଫୁଟର ଦୂରତା ରଖିବେ ।
ସେହିପରି କାମ କରିବାକୁ ଆସୁଥିବା କର୍ମଚାରୀଙ୍କୁ ମାସ୍କ, ହ୍ୟାଣ୍ଡ ଓ୍ଵାସ୍ ଓ ସାନିଟାଇଜର ଯୋଗାଇ ଦେବେ ଦୋକାନ ମାଲିକ ବା ପରିଚାଳକ । ବ୍ୟବସାୟ ପ୍ରତିଷ୍ଠାନରେ କାମ କରୁଥିବା କର୍ମଚାରୀ ଅସୁସ୍ଥ ଥିଲେ, ସେମାନଙ୍କୁ ଛୁଟି ଦେବା ପାଇଁ ପରାମର୍ଶ ଦିଆଯାଇଛି । ଏହା ସହ ବ୍ୟବସାୟିକ ପ୍ରତିଷ୍ଠାନମାନେ କୌଣସି ସଭା ସମିତି କିମ୍ବା ସାଂସ୍କୃତିକ କାର୍ଯ୍ୟକ୍ରମ ନକରିବା ପାଇଁ ନିର୍ଦ୍ଦେଶ ଦିଆଯାଇଛି । ଖଣ୍ଡଗିରି ଅଞ୍ଚଳରେ ରହୁଥିବା ଲୋକ ଓ ବ୍ୟବସାୟୀଙ୍କୁ ପୋଲିସ ପକ୍ଷରୁ ଏନେଇ ମାଇକ୍ ଦ୍ୱାରା ସଚେତନ କରାଯାଇଛି ।
