ବିଶ୍ୱ ପାଇଁ ବିପଦ ପାଲଟିଛି କରୋନା: ସାରା ବିଶ୍ବରେ ୧୬ହଜାର ଟପିଲା ମୃତ୍ୟୁ ସଂଖ୍ୟା, ସାଢ଼େ ୩ ଲକ୍ଷରୁ ଅଧିକ ଆକ୍ରାନ୍ତ
ନୂଆଦିଲ୍ଲୀ: ମାନବ ସଭ୍ୟତା ପାଇଁ ବିପଦ ପାଲଟିଛି କରୋନା । ୧୯୫ ରାଷ୍ଟ୍ରକୁ ରାହୁ ଭଳି ଗ୍ରାସି ସାରିଲାଣି ଭୂତାଣୁ । ଏବେ ପ୍ରତିଦିନ ହଜାରେ ସଂଖ୍ୟାରେ ମୁଣ୍ଡ ନେବା ଆରମ୍ଭ କରିଛି ପ୍ରାଣଘାତୀ ଭୂତାଣୁ । ମୃତ୍ୟୁ ସଂଖ୍ୟା ୧୬ହଜାର ଟପିଛି। ଆକ୍ରାନ୍ତ ସଂଖ୍ୟା ସାଢ଼େ ୩ ଲକ୍ଷରୁ ଅଧିକ । ଇଟାଲୀରେ ମୃତ୍ୟୁର ବିଭୀଷିକା ଖେଳାଇଛି କରୋନା । ସେଠାରେ ପୋକ ମାଛି ଭଳି ମରୁଛନ୍ତି ଲୋକ । ଇଟାଲିରେ ଗୋଟିଏ ଦିନରେ ୬୦୧ଜଣଙ୍କ ମୃତ୍ୟୁ ହୋଇଛି ।
ବର୍ତ୍ତମାନ ସୁଦ୍ଧା ଇଟାଲୀରେ ୬ହଜାର ୭୭ଜଣଙ୍କ ମୁଣ୍ଡ ନେଲାଣି ଭୟଙ୍କର ଭାଇରସ । ୬୩ ହଜାରରୁ ଅଧିକ ଲୋକ କରୋନାରେ ଆକ୍ରାନ୍ତ ହୋଇଛନ୍ତି । ତେବେ କରୋନା ଭାଇରସ୍ରେ ମୃତ୍ୟୁ ସଂଖ୍ୟା ଆହୁରି ଅଧିକ ବୋଲି ଇଟାଲିଆନ୍ ମେୟର ପକ୍ଷରୁ କୁହାଯାଇଛି । କରୋନା ସହ ଲଢେଇରେ ଅଚଳ ହୋଇ ଯାଇଛି ପୂରା ଦେଶ । ଇଟାଲୀରେ ସବୁ ଜରୁରୀ କାରବାର ମଧ୍ୟ ବନ୍ଦ କରି ଦିଆଯାଇଛି । ସେହିପରି ସ୍ପେନ୍, ଫ୍ରାନ୍ସ, ଆମେରିକା, ଇଂଲଣ୍ଡ ଓ ଇରାନରେ ସ୍ଥିତି ସଙ୍ଗୀନ ହେବାରେ ଲାଗିଛି ।
ଚୀନ୍ରେ କରୋନାରେ ମୃତ୍ୟୁସଂଖ୍ୟା ୩ହଜାର ୨୭୭ରେ ପହଞ୍ଚିଛି। ସ୍ପେନ୍ରେ ଗୋଟିଏ ଦିନରେ ୫୩୯ ଜଣଙ୍କ ମୃତ୍ୟୁ ହୋଇଛି। ସ୍ପେନ୍ରେ ମୃତ୍ୟୁସଂଖ୍ୟା ୨୩ଶହ ଟପିଛି। ଇରାନ୍ରେ କରୋନାରେ ମୃତ୍ୟୁସଂଖ୍ୟା ୧ହଜାର ୮୧୨ରେ ପହଞ୍ଚିଛି। ଆମେରିକାରେ ମୃତ୍ୟୁସଂଖ୍ୟା ୫୫୨, ଫ୍ରାନ୍ସରେ ମୃତ୍ୟୁସଂଖ୍ୟା ୮୬୦ରେ ପହଞ୍ଚିଛି।
