ବିଜୁଳି ବିଲ୍ ପୈଠ କରିବାକୁ କିଡ୍ନୀ ବିକିବେ ଅର୍ସଦ ଓ୍ଵାର୍ସି, ଟ୍ଵିଟ୍ କରି ଦେଲେ ସୂଚନା
କରୋନା ଯୋଗୁ ଏବେ ସମସ୍ତଙ୍କ ବେପାର ଠପ୍ ହୋଇଛି। ଏଥିରୁ କଳାକାରମାନେ ମଧ୍ୟ ବାଦ୍ ପଡ଼ିନାହାନ୍ତି। ଲକ୍ଡାଉନ୍ ଯୋଗୁ ଦୀର୍ଘଦିନ ହେବ ଫିଲ୍ମ ସୁଟିଂ ବନ୍ଦ ଥିବାରୁ ଫିଲ୍ମ ଷ୍ଟାରଙ୍କ ନିକଟରେ ଆଉ ଟଙ୍କା ନାହିଁ। ଫଳରେ ସେମାନେ ଟଙ୍କା ପାଇଁ ଅନ୍ୟ ଉପରେ ନିର୍ଭରଶୀଳ ହୋଇଥିବା ଦେଖାଯାଇଛି। ବଲିଉଡ ଅଭିନେତା ଅର୍ସଦ ଓ୍ଵାର୍ସିଙ୍କ ସ୍ଥିତି ମଧ୍ୟ ଏବେ ସେହିଭଳି ହୋଇଛି। ଅର୍ସଦଙ୍କ ନିକଟରେ ଇଲେକ୍ଟ୍ରିକ୍ ବିଲ୍ ପୈଠ କରିବାକୁ ଟଙ୍କା ନଥିବାରୁ ସେ ଫ୍ୟାନ୍ ଫଲୋୟର୍ସଙ୍କୁ ନିଜ ପେଣ୍ଟିଂ କିଣିବାକୁ ଅନୁରୋଧ କରିଥିବା ଦେଖାଯାଇଛି।
ରବିବାର ଏକ ଟ୍ଵିଟ୍ କରି ଅର୍ସଦ ଲେଖିଛନ୍ତି ବିଜୁଳି ବିଲ୍ ପାଇଁ ଜୁଲାଇ ୫ ତାରିଖରେ ତାଙ୍କ ଆକାଉଣ୍ଟରୁ ୧.୦୩ ଲକ୍ଷ ଟଙ୍କା କଟିଛି। ଆଉ ଏକ ଟ୍ଵିଟ୍ରେ ନିଜ ପେଣ୍ଟିଂ ଫଟୋ ସେୟାର କରି ଅର୍ସଦ ଫ୍ୟାନ୍ ଓ ଫଲୋୟର୍ସଙ୍କୁ ତାହାକୁ କିଣିବାକୁ ଅନୁରୋଧ କରିଛନ୍ତି। ସେ ଲେଖିଛନ୍ତି ‘ଲୋକମାନେ ମୋ ପେଣ୍ଟିଂ କିଣନ୍ତୁ, ମୋତେ ଅଦାନୀ ଇଲେକ୍ଟ୍ରିକ୍ ବିଲ୍ ପୈଠ କରିବାର ଅଛି, କିଡ୍ନୀକୁ ଆଗାମୀ ବିଲ୍ ପାଇଁ ବଞ୍ଚାଇ ରଖିଛି’।
Thank you Rachana & @bombaytimes for the article. People please buy my paintings, I need to pay my Adani electric bill, kidneys am keeping for the next bill 🙏🏼 pic.twitter.com/ycAaSgxGnR
— Arshad Warsi (@ArshadWarsi) July 5, 2020
ଅର୍ସଦଙ୍କ ଏହି ଟ୍ଵିଟ୍ର ଉତ୍ତରରେ ଅଭିନେତ୍ରୀ ଟିସ୍କା ଚୋପ୍ରା କହିଛନ୍ତି ଆଉ କାହାକୁ ବିକ୍ରି କରିବା ପୂର୍ବରୁ ମୋ ପାଇଁ ଗୋଟେ ରଖିଥାନ୍ତୁ। ଏହାର ଜବାବରେ ଅର୍ସଦ ଲେଖିଛନ୍ତି ‘ଠିକ୍ ଅଛି… ଖାଲି ମତେ ବିଲ୍ ପାଇଁ ଟଙ୍କା ଜମା କରିବାକୁ ଦିଅନ୍ତୁ’। ତେବେ ଇଲେକ୍ଟ୍ରିକ୍ ବିଲ୍ ସମସ୍ୟା କେବଳ ଅର୍ସଦଙ୍କ ମୁଣ୍ଡ ବିନ୍ଧାର କାରଣ ପାଲଟିନି। ତାପସୀ ପନ୍ନୁ, ସୋହା ଅଲ୍ଲୀ ଖାନ୍, ନେହା ଧୁପିଆ, ବୀର ଦାସ, ରେଣୁକା ଶହାନେ ପ୍ରମୁଖ ସେଲିବ୍ରିଟିମାନେ ମଧ୍ୟ ୩-୧୦ ଗୁଣ ଅଧିକ ଇଲେକ୍ଟ୍ରିକ୍ ବିଲ୍ ଆସିଥିବା ଅଭିଯୋଗ କରିଛନ୍ତି।
And yes there is a light at the end of the tunnel. Quick response from @Adani_Elec_Mum problem solved. All you have to do is contact them…. thank you 🙏🏼 …
— Arshad Warsi (@ArshadWarsi) July 5, 2020
ସୂଚନାଯୋଗ୍ୟ ଯେ ମୁମ୍ବାଇରେ ବିଜୁଳି କମ୍ପାନୀଗୁଡ଼ିକ ସୂଚନା ଦେଇଥିଲେ ଯେ ବର୍ତ୍ତମାନର ଇଲେକ୍ଟ୍ରିକ୍ ବିଲ୍ରେ ମାର୍ଚ୍ଚ ଓ ଏପ୍ରିଲ ମାସର ମୋଟ ରାଶି ରହିଛି। ଏଣୁ ଇଲେକ୍ଟ୍ରିକ୍ ବିଲ୍ ଅଧିକ ଆସୁଛି।
