ଦେଶରେ କରୋନା ଭାଇରସ ମାମଲା ବୃଦ୍ଧି ପାଉଥିବା ବେଳେ କିଛି ସ୍ଥାନରୁ ଏପରି ଅବହେଳା ସାମ୍ନାକୁ ଆସୁଛି ଯାହା ଲୋକଙ୍କ ଜୀବନକୁ କ୍ଷତି ପହଞ୍ଚାଉଛି । ଏପରି ଏକ ଘଟଣା ତେଲେଙ୍ଗାନାର ସଙ୍ଗାରେଡିରେ ଦେଖିବାକୁ ମିଳିଛି । ସାଙ୍ଗେରେଡିରେ ଜଣେ କରୋନା ପଜିଟିଭ୍ ମହିଳାଙ୍କ ଅନ୍ତିମ ସଂସ୍କାରରେ ଯୋଗ ଦେଇଥିବା 25 ଜଣଙ୍କ ମଧ୍ୟରୁ 19 ଜଣ କରୋନା ପଜିଟିଭ୍ ବୋଲି ଜଣାପଡିଛି । ଏହି ସମସ୍ତ ଲୋକଙ୍କୁ ବର୍ତ୍ତମାନ ହାଇଦ୍ରାବାଦର ଗାନ୍ଧୀ ହସ୍ପିଟାଲରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ ମହିଳା ଜଣକ ତେଲେଙ୍ଗାନାର ସାଙ୍ଗାରେଡିରେ ରହୁଥିଲେ । 55 ବର୍ଷୀୟା ମହିଳା ସଙ୍ଗାରେଡିର ଜହିରାବାଦର ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିଲେ । ଜୁନ୍ 9 ରେ ଚିକିତ୍ସା ସମୟରେ ମହିଳାଙ୍କର ମୃତ୍ୟୁ ହୋଇଥିଲା । ଏହାପରେ ଡାକ୍ତରଖାନା ପ୍ରଶାସନ କରୋନା ରିପୋର୍ଟକୁ ଅପେକ୍ଷା ନକରି ମହିଳାଙ୍କ ମୃତଦେହକୁ ତାଙ୍କ ପରିବାର ସଦସ୍ୟଙ୍କୁ ହସ୍ତାନ୍ତର କରିଦେଇଥିଲେ । ପରେ ରିପୋର୍ଟ ଆସିବା ପରେ ମହିଳା ଜଣକ କରୋନା ପଜିଟିଭ୍ ଥିବା ଜଣାପଡିଥିଲା । ସେପଟେ ମହିଳାଙ୍କ ସମ୍ପର୍କୀୟମାନେ ପାରମ୍ପାରିକ ରୀତିନୀତି ପାଳନ କରି ତାଙ୍କ ମୃତଦେହକୁ ସଂସ୍କାର କରିସାରିଥିଲେ ।
ମିଳିଥିବା ଖବର ଅନୁଯାୟୀ ମହିଳାଙ୍କ ଅନ୍ତିମ ସଂସ୍କାରରେ 25 ଜଣ ଲୋକ ଯୋଗ ଦେଇଥିଲେ । ଯେଉଁମାନଙ୍କ ମଧ୍ୟରୁ 19 ଜଣଙ୍କ ଅବସ୍ଥା ଧୀରେ ଧୀରେ ଖରାପ ହେବାକୁ ଲାଗିଲା । ଅଧିକାଂଶ ଲୋକଙ୍କ ଠାରେ କରୋନା ଲକ୍ଷଣ ଦେଖାଯିବା ମଧ୍ୟ ଆରମ୍ଭ କଲା।ତାପରେ ଯେତେବେଳେ ଡାକ୍ତର ସମସ୍ତଙ୍କୁ ପରୀକ୍ଷା କଲେ ସେତେବେଳେ 19 ଜଣ କରୋନା ପଜିଟିଭ୍ ବୋଲି ଜଣାପଡିଥିଲା। ଆଉ ତାପରେ ମହିଳାଙ୍କ ପରିବାରକୁ ସୂଚନା ଦିଆଯାଇଥିଲା ଯେ ମୃତ ମହିଳା କରୋନା ପଜିଟିଭ୍ ଥିଲେ । ବର୍ତ୍ତମାନ ମାମଲାର ଗମ୍ଭୀରତାକୁ ଦୃଷ୍ଟିରେ ରଖି ପ୍ରଶାସନ ଶାନ୍ତିନଗରକୁ ଏକ କଣ୍ଟେଣ୍ଟମେଣ୍ଟ ଜୋନ୍ ବୋଲି ଘୋଷଣା କରିଛି ଏବଂ 350ଟି ପରିବାରରେ କରୋନା ଯାଞ୍ଚ କରାଯାଉଛି ।