ପୁଣି ଆନ୍ଧ୍ରର ପୂର୍ବତନ ମୁଖ୍ୟମନ୍ତ୍ରୀଙ୍କ ସଭାରେ ଅଘଟଣ: ଦଳାଚକଟାରେ ୩ ମୃତ, ଏକାଧିକ ଦଳୀୟ କର୍ମୀ ଆହତ
ନୂଆଦିଲ୍ଲୀ : ଆନ୍ଧ୍ର ପ୍ରଦେଶର ଗୁଣ୍ଟୁରରେ ପୂର୍ବତନ ମୁଖ୍ୟମନ୍ତ୍ରୀ ତଥା ଟିଡିପି ମୁଖ୍ୟ ଚନ୍ଦ୍ରବାବୁ ନାଇଡୁଙ୍କ ଜନସଭାରେ ରବିବାର ପୁଣି ଏକ ବଡ଼ ଧରଣ ଅଘଟଣ ଘଟିଛି । ଗୋଟିଏ ସପ୍ତାହରେ ଦ୍ୱିତୀୟ ଥର ପାଇଁ ଚନ୍ଦ୍ରବାବୁଙ୍କ ସଭାରେ ଦଳାଚକଟା ଦେଖିବାକୁ ମିଳିଛି । ଗତକାଲି ପ୍ରବଳ ଭିଡ଼ କାରଣରୁ ଦଳଚକଟାରେ ୩ ଜଣଙ୍କ ମୃତ୍ୟୁ ଘଟିଛି ଓ ବହୁ ଟିଡିପି କର୍ମୀ ଆହତ ହୋଇଛନ୍ତି । ଗୁରୁତରଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ଏଥିସହିତ ଅନେକ ବ୍ୟକ୍ତି ଆହତ ମଧ୍ୟ ହୋଇଛନ୍ତି । ଆନ୍ଧ୍ରରେ ବାରମ୍ବାର ଦଳାଚକଟାରେ ନିରୀହ ଜନତା ମୃତ୍ୟୁବରଣ କରୁଥିବା ଖବର ଏବେ ଚର୍ଚ୍ଚାରେ ରହିଛି ।
ପୂର୍ବତନ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଗୁଣ୍ଟୁରର ଜନସଭାରୁ ଯିବା ପରେ ଏଠାରେ ଦଳାଚକଟା ଆରମ୍ଭ ହୋଇଥିଲା । ଏଥିରେ ଆହତ ଲୋକଙ୍କୁ ନିକଟସ୍ଥ ସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି । ରାସନ କିଟ୍ ବିତରଣ ପାଇଁ ଡିଟିପି ପକ୍ଷରୁ ଏହି କାର୍ଯ୍ୟକ୍ରମର ଆୟୋଜନ କରାଯାଇଥିଲା । ହେଲେ ଶହ ଶହ ଲୋକ ବଂଟନ ସ୍ଥଳକୁ ବଳପୂର୍ବକୁ ଧସେଇ ପଶିବାକୁ ଉଦ୍ୟମ କରିବାରୁ ଦଳାଚକଟା ପରିସ୍ଥିତି ସୃଷ୍ଟି ହୋଇଥିଲା । ଏଥିରେ ତିନି ଜଣଙ୍କ ମୃତ୍ୟୁ ହୋଇଥିବା ବେଳେ ବହୁ ଟିଡିପି କର୍ମୀ ଆହତ ହୋଇଛନ୍ତି । ତେବେ ଚନ୍ଦ୍ରବାବୁଙ୍କ ସଭାରେ ବାରମ୍ବାର ପ୍ରବଳ ଭିଡ଼ ପରିଲକ୍ଷିତ ହେବା ସହିତ ଏକାଧିକ ଲୋକଙ୍କ ମୃତ୍ୟୁ ଘଟିବା ଏବେ ରାଜ୍ୟ ପ୍ରଶାସନର ଚିନ୍ତା ବଢ଼ାଇ ଦେଇଛି । ଆଗକୁ ଯେପରି ଏହି ଘଟଣାର ପୁନରାବୃତ୍ତି ନଘଟେ ସେଥିପାଇଁ ପ୍ରୟାସ ଜାରି ରହିଛି ।
ଏହା ପୂର୍ବରୁ ଚନ୍ଦ୍ରବାବୁ ନାଇଡୁଙ୍କ ନେଲୋର ରାଲିରେ ଦଳଚକଟା ହୋଇ ୮ ଜଣ ପ୍ରାଣ ହରାଇଥିଲେ । ବିରୋଧୀ ନେତା ଏନ.ଚନ୍ଦ୍ରବାବୁ ନାଇଡୁ ବୁଧବାର ଏକ ରୋଡ ଶୋକୁ ସମ୍ୱୋଧିତ କରିବା ସମୟରେ କେନାଲରେ ପଡି କିଛି ଜଣଙ୍କ ଜୀବନ ଯାଇଥିଲା । ଘଟଣାରେ ମୃତକଙ୍କ ପାଇଁ ୧୦ ଲକ୍ଷ ଲେଖାଏ ଅନୁକମ୍ପା ରାଶି ଘୋଷଣା କରାଯାଇଥିଲା ।
ତେବେ ସୁରକ୍ଷାରେ ତ୍ରୁଟି ଯୋଗୁଁ ବାରମ୍ବାର ଚନ୍ଦ୍ରବାବୁ ନାଇଡୁଙ୍କ ରାଜନୈତିକ କାର୍ଯ୍ୟକ୍ରମରେ ଏଭଳି ଅଘଟଣ ଦେଖିବାକୁ ମିଳୁଛି ।
