କଲରାପତରିଆ ବାଘ ଆତଙ୍କ : ୧୧ ଘଣ୍ଟାର ଉଦ୍ୟମ ପରେ କାବୁ କଲା ବନବିଭାଗ

ବାଲେଶ୍ବର (କେନ୍ୟୁଜ): ଦୀର୍ଘ ୧୧ ଘଣ୍ଟାର ଉଦ୍ୟମ ପରେ ବାଘକୁ କାବୁ କଲା ବନବିଭାଗ ।  କାଲି ଦିନ ସାରା ବାଲେଶ୍ବର ଜିଲ୍ଲା ଖଇରା ଅଞ୍ଚଳରେ ଲାଗି ରହିଥିଲା କଲରାପତରିଆ ବାଘ ଆତଙ୍କ ।  ଗଡ଼ ଗାଁରେ ବାଘ ଆକ୍ରମଣରେ ଜଣେ ମହିଳାଙ୍କ ସମେତ ୪ ଜଣ ଗୁରୁତର ଆହତ ହୋଇଥିଲେ ।  ଆହତ ମହିଳା ଜଣଙ୍କ ନିଜ ପୁଅ ଓ ସ୍ୱାମୀଙ୍କ ସହ ବାଡ଼ିରେ କାମ କରୁଥିବା ବେଳେ ବାଘ ଆକ୍ରମଣ କରିଥିଲା ।  ସେ ଚିତ୍କାର କରିବାରୁ ଗ୍ରାମବାସୀ ଏକାଠି ହୋଇ ବାଘଟିକୁ ଘଉଡାଇଥିଲେ ।  କିନ୍ତୁ ପରେ ପୁଣି ବାଘଟି ଆହତ ମହିଳାଙ୍କ ପୁଅ ଓ କିଛି ଲୋକଙ୍କୁ ଆକ୍ରମଣ କରିଥିଲା ।

ବାଘକୁ ଧରିବା ଲାଗି ଉଭୟ ଗ୍ରାମବାସୀ ଓ ବନ କର୍ମଚାରୀ ଜୋରଦାର ପ୍ରୟାସ ଚଳାଇଥିଲେ ।  ତେବେ ଏହି ସମୟରେ ଜଣେ ଫରେଷ୍ଟ ଗାର୍ଡ଼ ମଧ୍ୟ ବାଘ ଆକ୍ରମଣରେ ଆହତ ହୋଇଥିଲେ ।  ଦୀର୍ଘ ସମୟର ଉଦ୍ୟମ ପରେ ସିମିଳିପାଳରୁ ଏକ ଟିମ ପହଞ୍ଚି ଵାଘକୁ ଟ୍ରାଙ୍କୁଲାଇଜର ଦେଇ ଉଦ୍ଧାର କରିଥିଲେ ।  ବାଘକୁ ଦେଖିବା ପାଇଁ ବିଳମ୍ବିତ ରାତ୍ରି ପର୍ଯ୍ୟନ୍ତ ଭିଡ ଦେଖିବାକୁ ମିଳିଥିଲା ।  ବାଘ ଆକ୍ରମଣରେ ୫ ଜଣ ବନ କର୍ମଚାରୀ ଗୁରୁତର ଆହତ ଅବସ୍ଥାରେ ହୋଇ ମେଡ଼ିକାଲରେ ଭର୍ତ୍ତି ହୋଇଛନ୍ତି ।  ଗୁରୁତରଙ୍କୁ ପ୍ରଥମେ ଖଇରା,ପରେ ଭଦ୍ରକରୁ କଟକ ସ୍ଥାନାନ୍ତରିତ କରାଯାଇଛି ।