ପ୍ରେମ ପାଇଁ ସ୍ୱିଡେନ୍ରୁ ମୁମ୍ବାଇ, ବିଶ୍ୱାସ ରଖି ଯୁବକଙ୍କୁ ଦେଖା କରିବାକୁ ଘରୁ ଲୁଚି ଚାଲି ଆସିଲା ନାବାଳିକା
କୁହାଯାଏ, ପ୍ରେମ ଅନ୍ଧ ହୋଇଥାଏ ଏବଂ ଅନେକ ବାର ଏମିତି ଘଟଣା ସାମ୍ନାକୁ ଆସିଥାଏ, ଯାହା ଏହି ପ୍ରବାଦକୁ ଚରିତାର୍ଥ କରିଥାଏ। ନିକଟରେ ଏମିତି ହିଁ ଏକ ମାମଲା ସାମ୍ନାକୁ ଆସିଥିଲା, ଯେଉଁଥିରେ ଜଣେ ୧୬ ବର୍ଷୀୟା ସ୍ୱିଡେନ ଝିଅ ସୋସିଆଲ ମିଡିଆରେ ୧୯ ବର୍ଷୀୟ ଜଣେ ଯୁବକଙ୍କୁ ଭେଟିଥିଲା। ସେ ସେହି ଯୁବକଙ୍କ ସହିତ ବନ୍ଧୁତା କରିବା ପରେ ତାଙ୍କ ସହିତ ଦେଖା ହେବା ପାଇଁ ମୁମ୍ବାଇ ପର୍ଯ୍ୟନ୍ତ ଚାଲି ଆସିଥିଲା। କିନ୍ତୁ ଏଠାରେ ଏପରି କିଛି ଘଟିଥିଲା ଯେ ସେହି ଝିଅଟିକୁ ଶେଷରେ ପୋଲିସ ପଠାଇ ଦେଇଥିଲା।
ବାସ୍ତବରେ, ଏହି ସବୁ ଘଟଣା ସେତେବେଳେ ଘଟିଥିଲା, ଯେତେବେଳେ ସ୍ୱିଡେନର ଏହି ଝିଅ କିଛି ଦିନ ତଳେ ଟୁରିଷ୍ଟ ଭିସାରେ ମୁମ୍ବାଇ ପହଞ୍ଚିଥିଲା। ଏକ ରିପୋର୍ଟ ଅନୁଯାୟୀ, ଝିଅଟିର ସମ୍ପର୍କ ସୋସିଆଲ ମିଡିଆ ଜରିଆରେ ମୁମ୍ବାଇର ଜଣେ ଯୁବକଙ୍କ ସହିତ ଗଢ଼ି ଉଠିଥିଲା। ଆଉ ଏହାର କିଛି ଦିନ ପରେ ଝିଅ ନିଜ ଘର ଲୋକଙ୍କୁ ନ ଜଣାଇ ସେଠାରୁ ଚାଲି ଆସି ସିଧା ମୁମ୍ବାଇରେ ପହଞ୍ଚି ଯାଇଥିଲା।
ସେପଟେ ଝିଅର ମାଆ, ବାପା ସେଠାରେ ସ୍ୱିଡେନ ପୋଲିସ ଷ୍ଟେସନରେ ପହଞ୍ଚି ୨୭ ନଭେମ୍ବରରେ ଏକ ରିପୋର୍ଟ ଦାଖଲ କରିଥିଲେ ଏବଂ ସନ୍ଦେହ କରିଥିଲେ ଯେ ତାଙ୍କ ଝିଅ ଭାରତ ଚାଲି ଯାଇଥିବ। ସେଠାକାର ପୋଲିସ ଇଣ୍ଟରପୋଲ ମାଧ୍ୟମରେ ଭାରତ ସହ ଯୋଗାଯୋଗ କରିଥିଲା। ମୁମ୍ବାଇର କ୍ରାଇମ ବ୍ରାଞ୍ଚକୁ ଇଣ୍ଟରପୋଲ ଜରିଆରେ ୪ ଡିସେମ୍ବରରେ ଏକ ୟେଲୋ ନୋଟିସ ମିଳିଥିଲା ଏବଂ ଏହି ଆଧାରରେ ତଦନ୍ତ ଆରମ୍ଭ କରାଯାଇଥିଲା। ପୋଲିସକୁ ଝିଅର ସନ୍ଧାନ ମିଳିଥିଲା ଏବଂ ପୁଣି ଯୁବକଙ୍କର ମଧ୍ୟ ପତ୍ତା ମିଳି ଯାଇଥିଲା।
ରିପୋର୍ଟ ମୁତାବକ, ପୋଲିସକୁ ଯୁବକ କହିଥିଲେ ଯେ ଝିଅକୁ ସେ ଏକ କ୍ୟାମ୍ପରେ ରଖିଛନ୍ତି। କାହିଁକିନା, ପୁଅର ପରିବାର ଲୋକେ ଏଥିପାଇଁ ରାଜି ହୋଇ ନ ଥିଲେ। ଏହାପରେ ପୋଲିସ ଝିଅକୁ ନିଜ ହେପାଜତକୁ ନେଇ ତାଙ୍କ ମାଆ, ବାପାଙ୍କୁ ମୁମ୍ବାଇ ଡାକିଥିଲା। ଆଇନଗତ ଔପଚାରିକତା ପୂରା କରିବା ପରେ ଝିଅକୁ ତାଙ୍କ ମାଆ, ବାପାଙ୍କୁ ହସ୍ତାନ୍ତର କରାଯାଇଥିଲା। କୁହାଯାଉଛି କି, ଝିଅକୁ ଯୁବକଙ୍କ ବିଷୟରେ ମଧ୍ୟ ପଚରାଉଚରା କରାଯାଇଥିଲା, କିନ୍ତୁ ସେ ଯୁବକଙ୍କ ବିରୋଧରେ କିଛି କହି ନ ଥିଲା। ଝିଅଟି କହିଥିଲା ଯେ ସେ ନିଜ ଇଚ୍ଛାରେ ପୁଅକୁ ଭେଟିବାକୁ ଆସିଛି। ପୋଲିସ ଯୁବକଙ୍କ ବିରୋଧରେ କୌଣସି ମାମଲା ରୁଜୁ କରି ନାହିଁ। ବର୍ତ୍ତମାନ ଝିଅଟି ନିଜ ଘର ଲୋକଙ୍କ ସହିତ ସାଟନ୍ ସ୍ୱିଡେନ ଫେରି ଯାଇଛି।