ଅନ୍ତରୀକ୍ଷ ବିଷୟରେ କହିଲେ ନୀଳ ଆକାଶ, କଳା ବାଦଲ, ତାରା ଜହ୍ନ ଠାରୁ ଅଧିକ ବୋଧହୁଏ ଆମେ ଆଉକିଛି ଜାଣିନାହୁଁ । ସାଧାରଣତଃ ବୈଜ୍ଞାନିକ ଓ ଗବେଷକମାନେ ରିସର୍ଚ୍ଚ କରୁଥିବା ଅନ୍ତରୀକ୍ଷ ବିଷୟରେ ଅନେକ ଆଶ୍ଚର୍ଯ୍ୟକର କଥା ଶୁଣିବାକୁ ମିଳିଥାଏ । ଯାହାକୁ ଭେଦ କରିବା ସାଧାରଣ ମଣିଷ ପାଖେ ସମ୍ଭବ ନୁହେଁ । ସାଇନ୍ସ ଫିକ୍ସନଠୁ ବି ଅଧିକ ଆଶ୍ଚର୍ଯ୍ୟକର ଅଟେ ଅନ୍ତରୀକ୍ଷର ଦୁନିଆ ।
ଅନ୍ତରୀକ୍ଷରେ ଛଅ ମାସ ବିତାଇବା ପରେ ଅନ୍ତରୀକ୍ଷ ଯାତ୍ରୀମାନେ ନିଜର ବାସ୍ତବିକ ଉଚ୍ଚତାଠାରୁ ପ୍ରାୟ ତିନି ପ୍ରତିଶତ ଅଧିକ ଲମ୍ବା ହୋଇଯାଇଥାନ୍ତି । ଏହାର କାରଣ ହେଉଛି ସେମାନଙ୍କ ଉପରେ ପୃଥିବୀର ମାଧ୍ୟାକର୍ଷଣ ଶକ୍ତିର କୌଣସି ପ୍ରଭାବ ପଡ଼ିନଥାଏ । ଯାହାକି ତାଙ୍କର ଉଚ୍ଚତା ବୃଦ୍ଧି କରିଥାଏ । ଯଦିଓ ଏହା ଅସ୍ଥାୟୀ ଅଟେ ଏବଂ ପୃଥିବୀକୁ ଫେରିବାର କିଛି ମାସ ପରେ ପୁଣିଥରେ ସେମାନେ ନିଜ ପୂର୍ବାବସ୍ଥାକୁ ଫେରି ଆସିଥାନ୍ତି ।
ଏହାସହ ପଢନ୍ତୁ ଦୁନିଆର ସବୁଠୁ ସୁନ୍ଦର ସ୍ଥାନ ଯେଉଁଠିକୁ ଗଲେ ଆପଣ ଫେରି ପାରିବେନି ଜୀବିତ
ସ୍ପେସରେ ପାଣି ଗରମ କରିବା ପୃଥିବୀରେ ପାଣି ଗରମ କରିବାଠାରୁ ସମ୍ପୂର୍ଣ୍ଣ ଅଲଗା ହୋଇଥାଏ । କାରଣ ପୃଥିବୀରେ ପାଣି ଗରମ କଲେ ଏଥିର ଅନେକ ଗୁଡିଏ ଫୋଟକା ସୃଷ୍ଟି ହୋଇଥାଏ କିନ୍ତୁ ଅନ୍ତରୀକ୍ଷରେ ପାଣି ଗରମ କଲେ ସେଥିରେ କେବଳ ଗୋଟିଏ ବଡ଼ ଫୋଟକା ହୋଇଥାଏ । ଏହାର କାରଣ ଖୋଜିବା ପରେ ଜଣାପଡିଥିଲା ଯେ ଏଥିପାଇଁ ପୃଥିବୀର ମାଧ୍ୟାକର୍ଷଣ ଶକ୍ତି ଦାୟୀ । ସ୍ପେସରେ ଭିନ୍ନ ଭାବେ ପାଣି ଗରମ କରିବାରୁ ପ୍ରେରିତ ହୋଇ ବୈଜ୍ଞାନିକମାନେ ସ୍ପେସକ୍ରାଫ୍ଟକୁ ଶୀଘ୍ର ଥଣ୍ଡା ହେବାର ଉପାୟ ଖୋଜୁଛନ୍ତି ।
ଯଦି ଆପଣ ଭବିଷ୍ୟତରେ ସ୍ପେସକୁ ଯିବାର ସ୍ୱପ୍ନ ଦେଖୁଛନ୍ତି ତାହେଲେ ସୋଡା଼ ଓ କୋକ ପିଇବାର ଅଭ୍ୟାସକୁ ସମ୍ପୂର୍ଣ୍ଣ ଭାବେ ଭୁଲିଯାଆନ୍ତୁ । ସ୍ପେସରେ ଗ୍ରାଭିଟି ନଥିବା କାରଣରୁ ଗ୍ୟାସର ଫୋଟକା ଗୁଡିକ ନିଷ୍କ୍ରିୟ ହୋଇଯାଇଥାନ୍ତି ଏବଂ ସୋଡା଼ ପିଇବା ପରେ ମଧ୍ୟ ହାକୁଟି ଆସିନଥାଏ ଓ ପେଟଭିତରେ ବିଭିନ୍ନ ପ୍ରକାରର ସମସ୍ୟା ସୃଷ୍ଟି ହୋଇଥାଏ । ଅନ୍ତରୀକ୍ଷରେ ଫୁଲର ବାସ୍ନା ଭିନ୍ନ ହୋଇଥାଏ । ଏଠାରେ ତାପମାତ୍ରା, ଆର୍ଦ୍ରତା ଏବଂ ଅନ୍ୟ କାରକ ଗୁଡିକ କାରଣରୁ ଗଛରୁ ଜନ୍ମ ହୋଇଥିବା ତେଲିୟ ତତ୍ତ୍ୱ ପ୍ରଭାବିତ ହୋଇଥାଏ ଯାହାର ପ୍ରଭାବ ବାସ୍ନା ଉପରେ ପଡିଥାଏ । ସ୍ପେସରେ ମାଧ୍ୟାକର୍ଷଣ ଶକ୍ତିର ପ୍ରଭାବ ନଥାଏ ତେଣୁ ଶରୀରରୁ ଝାଳ ବୋହିଲେ ନା ତାହା ତଳକୁ ପଡିଥାଏ ନା ଶୁଖିଥାଏ ଯେଉଁଥିପାଇଁ ଝାଳ ଯେଉଁଠିକୁ ସେଇଠି ହିଁ ରହିଥାଏ ।