ବିନା ଇଣ୍ଟରନେଟ୍ କାମ କରିବ ଗୁଗୁଲ୍ ଡ୍ରାଇଭ୍, ଖୋଲି ପାରିବେ ଫଟୋ ଏବଂ ଫାଇଲ୍
ଗୁଗୁଲ୍ ଡ୍ରାଇଭ୍ ବର୍ତ୍ତମାନ ଅଫଲାଇନ୍ ମୋଡ୍ କୁ ସପୋର୍ଟ କରିବା ଆରମ୍ଭ କରିଛି । କମ୍ପାନୀ ଏହାର ଏକ ବ୍ଲଗ୍ ପୋଷ୍ଟରେ ଏହା ଘୋଷଣା କରିଛି। ବର୍ତ୍ତମାନ ୟୁଜର୍ସ ମାନେ ଇଣ୍ଟରନେଟ୍ ବିନା ଗୁଗୁଲ୍ ଡ୍ରାଇଭରେ ଫାଇଲ୍, ପିଡିଏଫ୍ ଏବଂ ଫଟୋ ପ୍ରବେଶ କରିପାରିବେ। ତଥାପି, ଏଥିପାଇଁ ଆପଣଙ୍କୁ ଏହି ଫାଇଲଗୁଡ଼ିକୁ ପୂର୍ବରୁ ଅଫଲାଇନରେ ମାର୍କ କରିବାକୁ ପଡିବ। ଏହା ପରେ ଅଫଲାଇନ୍ ମୋଡ୍ ରେ ବ୍ରାଉଜର୍ ମାଧ୍ୟମରେ ଏହି ଫାଇଲଗୁଡିକ ଖୋଲାଯାଇପାରିବ ।
ନୂତନ ଫିଚର୍ସ କିପରି ବ୍ୟବହାର କରିବେ
ସୂଚନା ଅନୁସାରେ ଗୁଗୁଲ ୨୦୧୯ ରେ ଏହି ଫିଚର୍ସ ପରୀକ୍ଷା କରିବା ଆରମ୍ଭ କରିଛି ଏବଂ ବର୍ତ୍ତମାନ ଏହି ଫିଚର୍ସ ସମସ୍ତ ଉପଭୋକ୍ତାଙ୍କୁ ଦିଆଯାଉଛି । ଏହାକୁ ବ୍ୟବହାର କରିବାକୁ, ଗୁଗୁଲ୍ ଡ୍ରାଇଭ୍ ର ଡେସ୍କଟପ୍ ଆପ୍ ପ୍ରଥମେ ମ୍ୟାକ୍ କିମ୍ବା ୱିଣ୍ଡୋଜରେ ଇନଷ୍ଟଲ ହେବା ଜରୁରୀ । ଏହା ସହିତ, ୱେବରେ Drive settings ସମୂହରେ “ଅଫଲାଇନ୍” ଆକସେସ୍ ଅପ୍ସନ୍ ସକ୍ଷମ ହେବା ଆବଶ୍ୟକ । ସେଟ୍ ଅପ୍ ପ୍ରକ୍ରିୟା ସମାପ୍ତ ହେବା ପରେ, ଯେତେବେଳେ ଆପଣ ଫାଇଲ୍ ଉପରେ ଡାହାଣ କ୍ଲିକ୍ କରିବେ, “Available offline” ଦେଖାଯିବ ।
ଏହି ଫିଚର୍ସ ସମସ୍ତ Google Workspace ଗ୍ରାହକଙ୍କ ସହିତ Cloud Identity Free, Cloud Identity Premium, G Suite Basic ଏବଂ ବ୍ୟବସାୟ ଗ୍ରାହକଙ୍କ ପାଇଁ ଉପଲବ୍ଧ ରହିଛି । ବ୍ୟକ୍ତିଗତ ଆକାଉଣ୍ଟ ଥିବା ଲୋକଙ୍କ ପାଇଁ ଗୁଗୁଲ୍ ମଧ୍ୟ ଏହାକୁ ରୋଲ୍ କରୁଛି। ଯଦି ଆପଣଙ୍କର 15 GB ମାଗଣା ଷ୍ଟୋରେଜ୍ ସରିଯାଏ , ତେବେ ଗୁଗୁଲ୍ ଡ୍ରାଇଭରେ କନଟେକ୍ଟ ବ୍ୟାକଅପ୍ ଜାରି ରଖିବା ପାଇଁ ଆପଣ ଅତିରିକ୍ତ ଷ୍ଟୋରେଜ୍ କ୍ରୟ କରିପାରିବେ। ଭାରତୀୟ ବ୍ୟବହାରକାରୀଙ୍କ ପାଇଁ ବିଭିନ୍ନ ମାସିକ ଏବଂ ବାର୍ଷିକ ଯୋଜନା ଉପଲବ୍ଧ ରହିଛି ।
ଗୁଗୁଲ ମାସକୁ ୧୩୦ ଟଙ୍କା ପାଇଁ ୧୦୦ ଜିବି ଷ୍ଟୋରେଜ୍ ସ୍ପେସ୍ ପ୍ରଦାନ କରୁଛି । ଯଦି ଆପଣଙ୍କୁ ଅଧିକ ସ୍ପେସ୍ ଦରକାର, ତେବେ ଗୁଗୁଲର ମାସକୁ ୬୫୦ ଟଙ୍କା ପ୍ଲାନ ଅଛି, ଯେଉଁଥିରେ ଆପଣ 2TB ଷ୍ଟୋରେଜ୍ ପାଇବେ। ଏହା ସହିତ ଗୁଗୁଲ୍ ୨୦୦ ଟଙ୍କା ପ୍ଲାନ ମଧ୍ୟ ପ୍ରଦାନ କରୁଛି, ଯେଉଁଥିରେ ଆପଣ 200 GB ଷ୍ଟୋରେଜ୍ ସ୍ପେସ୍ ପାଇବେ ।
