କରୋନା ମୁକାବିଲା ପାଇଁ ଟ୍ଵିଟ୍ରର ପ୍ରତିଷ୍ଠାତା ଜ୍ୟାକ୍ ଡୋର୍ସିଙ୍କ ସହାୟତା ରାଶି ଘୋଷଣା, ନିଜ ସମ୍ପତ୍ତିରୁ ଏକ ତୃତୀୟାଂଶ କରିବେ ଦାନ
କରୋନାକୁ ନେଇ ସାରା ବିଶ୍ୱରେ ଆତଙ୍କ । ଏହାର ମୁକାବିଲା ପାଇଁ ବିଭିନ୍ନ ସ୍ତରରେ ଆରମ୍ଭ ହୋଇଯାଇଛି ପ୍ରସ୍ତୁତି । ସରକାର ଏନେଇ ଅନେକ ଯୋଜନା ପ୍ରଣୟନ କରିଛନ୍ତି । ମହାମାରୀକୁ ସମୂଳେ ନାଶ କରିବା ପାଇଁ ଅନେକ କାର୍ଯ୍ଯନୁଷ୍ଠାନ ଗ୍ରହଣ କରିଛନ୍ତି । ଆକ୍ରାନ୍ତଙ୍କ ଚିକିତ୍ସାଠାରୁ ଆରମ୍ଭ କରି ସଂକ୍ରମଣକୁ ପ୍ରତିହତ କରିବା ପାଇଁ ସରକାରଙ୍କ ସହିତ ଅଣ୍ଟା ଭିଡିଛନ୍ତି ଅନେକ ଲୋକେ । ଯେମିତି କିଏ ଭୋକରେ ନରହିବେ ସେଥିପାଇଁ ରିଲିଫ୍ ଫଣ୍ଡକୁ ଆର୍ଥିକ ସହାୟତା ପ୍ରଦାନ କରୁଛନ୍ତି। ସେ ସାଧାରଣ ଲୋକଠୁ ଆରମ୍ଭ କରି ବଡବଡିଆ ଯାଏ ସମସ୍ତଙ୍କୁ ପ୍ରଭାବ ପକାଇଛି ଏହି କହାମାରୀ କରୋନା । ଏପରି ସ୍ଥଳେ ଅନେକ ଛୋଟ ବଡ କମ୍ପାନୀ ନିଜ ସକ୍ଷମ ମୁତାବକ ଏହି ଲଢେଇରେ ସାମିଲ୍ ହୋଇଛନ୍ତି । ଯେପରି କେହିବି ଭୋକ ଉପାସରେ ନରୁହନ୍ତୁ ସେଥିପାଇଁ ଏକତ୍ରୀତ ହୋଇଛନ୍ତି ।
ନିକଟରେ ଟାଟା ଟ୍ରଷ୍ଟ କରୋନା ଭାଇରସ୍ର ମୁକାବିଲା ପାଇଁ ୫୦୦ କୋଟି ଟଙ୍କାର ସହାୟତା ରାଶି ପ୍ରଦାନ କରିଥିଲା । ଏହାସହ ରିଲାଏନ୍ସ ଇଣ୍ଡଷ୍ଟ୍ରିଜ ମୁଖ୍ୟ ମୁକେଶ ଅମ୍ବାନୀ ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ୱାନକୁ ସମର୍ଥନ କରି ପିଏମ କେୟାର୍ସ ଫଣ୍ଡକୁ ୫୦୦ କୋଟି ଟଙ୍କା ଦାନ କରିଥିଲେ । ଖାଲି ସେମିତି ନୁହେଁ ଏହି ମରାତ୍ମକ ମହାମାରୀର ମୁକାବିଲା କରିବା ପାଇଁ ଅନେକ ସେଲିବ୍ରିଟି,କ୍ରିକେଟର ଏବଂ ସୋସିଆଲ ୱାକର୍ସ ସାହାୟତା ଅର୍ଥ ପ୍ରଦାନ କରିଛନ୍ତି । ବିଶ୍ବର ଏହି ସଙ୍କଟରେ ନିଜର ମାନବିକତା ଦେଖାଇଛନ୍ତି।
ଏହି କ୍ରମରେ ବର୍ତ୍ତମାନ ସାମିଲ୍ ହୋଇଛନ୍ତି ସୋସିଆଲ ସାଇଟ୍ ଟ୍ୱିଟର ପ୍ରତିଷ୍ଠାତା ତଥା ସିଇଓ ଜ୍ୟାକ୍ ଡୋର୍ସି । ଯିଏ କରୋନା ମୁକାବିଲା ପାଇଁ ଏକ ବିଲିୟନ୍ ଡଲାର ସହାୟତା ଦେବେ ବୋଲି ଘୋଷଣା କରିଛନ୍ତି । ଯାହା ଭାରତୀୟ ମୁଦ୍ରା ଅନୁସାରେ ପାଖାପାଖି ୬ହଜାର ୫୦୦କୋଟି ହେବ । ସେ ତାଙ୍କ ସହାୟତା ଫଣ୍ଡ ମାଧ୍ୟମରେ କରୋନା ଭାଇରସ୍ର ମୁକାବିଲା ପାଇଁ ନିଜ କମ୍ପାନୀ ସମ୍ପତ୍ତିରୁ ପାଖାପାଖି ଏକ ତୃତୀୟାଂଶ ପ୍ରଦାନ କରିଛନ୍ତି । ଯାହା ସେ ଡିଜିଟାଲ ପେମେଣ୍ଟ ଗ୍ରୁପ୍ Squareରେ ଥିବା ତାଙ୍କ ଅଂଶରୁ ତାଙ୍କ ସଂଗଠନ Start Small LLC କୁ ଟ୍ରାନ୍ସଫର କରିବେ । ସେ ଏନେଇ ନିଜେ ଟ୍ଵିଟ୍ କରି ସୂଚନା ଦେଇଛନ୍ତି । ଏକଥା ଶୁଣିବା ପରେ ନିହାତୀ ତାଙ୍କର ମହାନତା ଏବେ ସମସ୍ତଙ୍କ ସାମ୍ନାରେ । ତାଙ୍କର ଏହି ସହାୟତ ନିଶ୍ଚିତ କରୋନା ମୁକାବିଲା ପାଇଁ ଏକ ବଡ ଯୋଗଦାନ ସାବ୍ଯସ୍ତ ହେବ।
ଜ୍ୟାକ୍ ପାଟ୍ରିକ୍ ଡୋର୍ସିଙ୍କ ଜନ୍ମ ୧୯ ନଭେମ୍ବର, ୧୯୭୬ ରେ ହୋଇଥିଲା । ସେ ଜଣେ ଆମେରିକୀୟ କମ୍ପ୍ୟୁଟର ପ୍ରୋଗ୍ରାମର ତଥାଇଣ୍ଟରନେଟ୍ ଉଦ୍ୟୋଗୀ ଯିଏ ଟ୍ୱିଟରର ସହ-ପ୍ରତିଷ୍ଠାତା ତଥା ସିଇଓ ଏବଂ ମୋବାଇଲ୍ ପେମେଣ୍ଟ୍ କମ୍ପାନୀ ସ୍କୋୟାରର ପ୍ରତିଷ୍ଠାତା ତଥା ସିଇଓ ଅଟନ୍ତି। ସେ ନିଜର ଅସାଧାରଣ ଜୀବନ ବିଳାସପୂର୍ଣ୍ଣ ଜୀବନ ପାଇଁ ବେସ୍ ପ୍ରସିଦ୍ଧ । ଜ୍ୟାକ୍ ଡୋର୍ସି ୨୦୧୫ ଠାରୁ ଉଭୟ ସୋସିଆଲ୍ ମିଡିଆ ପ୍ଳାଟଫର୍ମ ଟ୍ୱିଟର ଏବଂ କ୍ଷୁଦ୍ର ବ୍ୟବସାମକମ୍ପାନୀ ସ୍କୋୟାରର ସିଇଓ ରହିଆସିଛନ୍ତି। ଡୋର୍ସି ୨୦୦୬ ରେ ଇଭି ୱିଲିୟମ୍ସ, ବିଜ ଷ୍ଟୋନ ଏବଂ ନେହା ଗ୍ଲାସଙ୍କ ସହ ଟ୍ୱିଟରରେ ସହଯୋଗ କରିଥିଲେ । ସେବେଠାରୁ ସେ ଆଉ ପଛକୁ ଫେରି ଦେଖିନାହାନ୍ତି । ତେବେ ଆଜି ତାଙ୍କର ଏହି ମହାନତା ସମସ୍ତଙ୍କ ପାଇଁ ଏକ ଉଦାହରଣ । ତେବେ କରୋନା ମହାମାରୀର ମୁକାବିଲା ପାଇଁ ଆମ ସମସ୍ତଙ୍କୁ ସାମିଲ୍ ହେବାକୁ ପଡିବ । ଯାହା ଏହି କରୋନା ଯୁଦ୍ଧରେ ଆମକୁ ଜିତିବାରେ ନିହାତୀ ସହାୟକ ହେବ ।
